Ballkani “integrohet” në BE – Rajoni në tryezën e ministrave të Jashtëm, bashkë me Mogherinin
Ballkani Perëndimor duket se po integrohet me “forcë” në Bashkimin Europian. Në datat 15 dhe 16 shkurt ministrat e jashtëm të unionit do të zhvillojnë takimin e tyre informal pikërisht në Sofje të Bullgarisë, vend i cili mban edhe presidencën e radhës së unionit si dhe një vend që e ka deklaruar haptazi integrimin e Ballkanit si prioritet të presidencës së saj.
Mësohet se, pjesë e axhendës, veç çështjeve të sigurisë do të jetë edhe Ballkani Perëndimor. Në takim ndërkohë do të jenë të pranishëm edhe ministrat e jashtëm të gjashtë vendeve plus Turqinë, përfshirë Ministrin e Punëve të Jashtme dhe Çështjeve Europiane të Republikës së Shqipërisë, Ditmir Bushatin. Ftesa vjen vetëm pak ditë pasi Brukseli shpalosi zyrtarisht strategjinë e re të zgjerimit, që flet për vullnet të plotë të vendeve anëtare sa i përket integrimit të rajonit në familjen e përbashkët. Takimi vjen gjithashtu pak kohë përpara mbajtjes së samitit të parë që prej vitit 2003 mes Brukselit dhe Ballkanit Perëndimor.
Ky samit do të mbahet në muajin Maj në Sofje, dhe është pikërisht nga Sofja zyrtare nismëtare e këtij samiti. Sipas axhendës zyrtare, ministrat e jashtëm të rajonit do të takohen edhe me përfaqësuesen e lartë të Bashkimit Europian për politikën e jashtme, Federcia Mogherini dhe ministrat e Jashtëm të 28 vendeve të unionit ditën e Premte.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.