Ballkani me treg të përbashkët, BERZH: Mbështesim projektin, do prezantohet në Trieste
6 vendet e Ballkanit perëndimor, do të formojnë zonën ekonomike të përbashkët me ndihmën e Bankës Europiane për Rindërtim dhe Zhvillim, deklaroi zëvendës Presidenti i institucionit Pierre Heilbronn, në një intervistë për Reuters.
Kjo iniciativë u njoftua disa muaj më parë nga Komisioneri për zgjerim dhe fqinjësi të mirë Johannes Hahn, dhe deri më tani ka gjetur një mbështetje të gjerë mes vendeve të rajonit, paçka se nuk ka ende konsensus të plotë.
Sipas numrit dy të BERZH, qëllimi është që të krijohet një treg i vetëm prej 20 milionë banorësh nëpërmjet eliminimit të barrierave tregtare, harmonizimit të legjislacioneve përkatëse në fushën e tregtisë etj.
Sipas Bankës Europiane për Rindërtim dhe Zhvillim, vetëm në këtë mënyrë 6 vendet e Ballkanit Perëndimor, mund të bëhen atraktive për investitorë të fuqishëm.
Shqipëria, Bosnja, Kosova, Maqedonia, Mali i Zi dhe Serbia do ta prezantojnë zyrtarisht këtë projekt në Trieste javën e ardhshme, deklaroi Heilbronn.
Berzh shpreson se ky projekt do të rinxisë dëshirën e këtyre vendeve për të bërë progres në një kohë që Bashkimi Europian duket se nuk ka shumë dëshirë për zgjerim.
Sa i përket suksesit të këtij projekti, Heilbronn deklaroi se, çelësi i suksesit do të jetë përfshirja sa më e vogël e politikës.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.