Banka Botërore: Shqipëria në recesion këtë vit. Shërbimet nxisin rënien. Efekt afatshkurtër, në 2021, ekonomia në “boom”
Banka Botërore ka publikuar këtë të enjte raportin periodik të pranverës për vendet e Europës dhe Azisë Qendrore, i cili këtë sezon reflekton edhe situatën me pandeminë globale. Banka Botërore bëhet kështu institucioni i parë i këtyre përmasave që bën një projeksion të impaktit ekonomik të pandemisë. Si rrjedhojë e emergjencës që ka goditur të gjithë globin, projeksionet për rritjen ekonomike të Shqipërisë këtë vit flasin për recesion.
Norma, sipas Bankës do të jetë negative, në -1.4%. Ndër sektorët vetëm shërbimet pritet të jenë në kontraktim, ndërkohë që bujqësia dhe industria do të jenë sërish në rritje, paçka se modeste. Efekti duket të jetë vetëm afat-shkurtër, rrjedhojë e pashmangshme e paralizës së ekonomisë, me ta paktën një muaj. Po të shohim projeksionet e vitit të ardhshëm, flasin për një rritje ekonomike në 6.6%, ç`ka sinjalizon një rikuperim të një pjese të humbjeve të vitit aktual.
Rritja ekonomike pritet t`i rikthehet normalitetit vetëm në vitin 2022. Banka Botërore parashikon një rënie të eksporteve shqiptare me 17% gjatë këtij viti. Sa i përket parametrave fiskalë, pritet një zhbalancim i lehtë, me borxhin publik që do të kapërcejë sërish nivelin e 70% në raport me Prodhimin e Brendshëm Bruto. Edhe defiçit fiskal pritet të thellohet gjatë këtij viti. Ashtu si me rritjen ekonomike, edhe parametrat fiskale pritet t`i rikthehen normalitetit gjatë dy viteve të ardhshme.
Edhe indikatorët që masin normën e varfërisë pritet të pësojnë një rritje të lehtë gjatë këtij viti, thotë institucioni me bazë në Washington. Banka sqaron se gjithcka varet nga kohëzgjatja e masave dhe e bllokimit. Në rast se këto masa do të vazhdojnë edhe përgjatë tremujorit të dytë të vitit, atëherë efektet negative pritet të jenë ndjeshëm më të mëdha.
Në tremujorin e fundit ndërkohë, rindërtimi por edhe rimëkëmbja e turizmit mund t`i japin një shtysë të fortë aktivitetit ekonomik të vendit. Ndër të tjera, në raport thuhet se, likuiditeti i madh në sektorin bankar vendas largon frikën e rrezikut për financim.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.