Banka e Anglisë, kundër proteksionizmit – Carney: Do të kushtojë vende pune dhe frenojë rritjen ekonomike
Guvernatori i Bankës së Anglisë, Mark Carney, tha se ndjekja e proteksionizmit do të kushtojë vende pune dhe se ekzistojnë shenja se barrierat tregtare po frenojnë ekonominë globale.
“Mund të zgjedhim midis proteksionizmit që fokusohet në bilancet dypalëshe tregtare të mallrave dhe liberalizimit të tregtisë globale në shërbime. E para do të kushtojë vende pune, frenojë rritjen dhe cënojë stabilitetin, ndërsa e dyta mund të mbështesë globalizimin”, tha guvernatori i Bankës së Anglisë, Mark Carney.
Mbi tarifat e muajit Qershor të Shteteve të Bashkuara, Carney tha se ndikimi do të jetë i vogël. Megjithatë, ai shtoi se nëse këto vazhdojnë të rriten, ndikimi do të jetë i madh dhe do të ketë gjithashtu efekte të tërthorta në ekonomi, nëpërmjet besimit të biznesit dhe kushteve financiare.
Carney tha se normat e interesit në të gjithë botën mund të kthehen në nivelet mesatare që kanë qenë përpara krizës, apo në 5% për Britaninë, por që çdo gjë duhet të ndodhë sipas projeksioneve që të arrihet ky skenar.
Carney shtoi se bankat britanike mund të përballen me një provë të rezistencës në rastin e një Brexit pa marrëveshje (hard brexit) në Mars të vitit që vjen, nëse Londra dhe Brukseli dështojnë të bien në dakordësi për marrëdhënien që do të kenë në të ardhmen. Ai tha gjithashtu se vendet e Bashkimit Europian nuk kanë gjasa që të imitojnë rolin e Londrës si një qendër financiare globale.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.