Banka e Anglisë, në pritje – Rritet numri i politikëbërësve që kërkojnë tkurrjen monetare
Banka e Anglisë mbajti normat e interesit të pandryshuara në takimin e muajit Qeshor, por ekonomisti kryesor i institucionit i’u bashkua pakicës në Komisionin e Politikave Monetare, që bënë thirrej për rritje të interesave. Kjo solli rritjen e pritshmërive në tregje për një ndërhyrje sa më shpejtë të jetë e mundur. Banka Qendrore caktoi gjithashtu udhëzime të reja për kohën se kur mund të reduktojë programin e lehtësimit sasior prej 435 miliardë paund, duke thënë se kjo mund të vijë pasi normat e interesit të kenë arritur në 1.5%.
Komisioni votoi me 6 pro 3 kundër, për të mbajtur normën bazë të interesit në 0.5%. Ekonomisti kryesor i Bankës së Anglisë, Andy Haldane, u bashkua me 2 anëtarë të tjerë, duke kërkuar rritjen e interesave në 0.75%, për shkak të shqetësimeve se negociatat e fundit për pagat dhe kërkesa e tregut të punës, mund të rrisë nivelin e pagave më shpejtë se ç’pritej. Kjo ka shtuar mundësitë e ndërhyrjes në takimin e muajit Gusht, diçka që pritet nga pjesa më e madhe e analistëve.
Komisioni i Politikave Monetare deklaroi se ngadalësimi në tremujorin e parë ishte i përkohshëm dhe i lidhur me motin e pazakontë. Banka e Anglisë deklaroi se shpenzimet konsumatore dhe treguesit e ndjesisë mbi ekonominë janë rimëkëmbu, ndërsa rënia e prodhimit në fabrika në Prill reflekton inventarët e mëdhenj të ndërtuar nga firmat në periudhën e motit të ftohtë. Paundi ra në nivelin më të ulët në 7 muaj përpara takimit në 1.3125 kundër dollarit amerikan. Pas përfundimit të takimit, valuta mori nxitje duke prekur 1.32.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.