Banka e Anglisë varet nga Brexit – Le interesat e pandryshuara, lëvizja e radhës do kushtëzohet nga “divorci”
Banka e Anglisë mbajti normat e interesit të pandryshuara në takimin 2-ditor të kësaj jave dhe Guvernatori, Mark Carney, tha se normat e interesit mund të rriten më shpejtë në të ardhmen.
Megjithatë, ai paralajmëroi se të gjithë projeksionet do të hidhen poshtë nëse Brexit ndodh në mënyrë të ç’rregullt.
Komisioni i Politikave Monetare votoi në mënyrë unanime për të mbajtur normat e interesit në 0.75%, pas ndërhyrjes në muajin Gusht, që ishte edhe e dyta rritje që prej krizës financiare.
Mark Carney, tha se cikli tkurrës monetarë mund të jetë më i shpejtë prej pasigurive nga Brexit.
“Banka e Anglisë mund të reagojë ndaj Brexit me më shumë rritje të normave të interesit. Brexit pa marrëveshje dhe pa periudhë të tranzicionit nuk është skenari që ka më shumë gjasa. Ekonomia e Mbretërisë së Bashkuar është në një proces të përshtatjes ndaj një marrëdhënieje ekonomike me BE që është ende e pasigurt, ashtu si ç’ka qenë që pas referendumit”.
Brexit ka mbizotëruar tashmë perspektivën e ekonomisë së 5 më të madhe në botë, që është ngadalësuar që prej referendumit të vitit 2016.
Banka e Anglisë bëri të ditur se konsumi pa pasur performancë të fortë në muajt e fundit, por bizneset nuk po investojnë sa ç’duhet, për shkak të pasigurive në lidhje me daljen nga Europa.
Theresa May nuk ka arritur ende një marrëveshje me Bashkimin Europian. Banka paralajmëroi se dalja pa marrëveshje nga Europa mund të shtojë presionet te inflacioni nga rënia e valutës, do të dëmtojë zinxhirin e furnizimit dhe sjellë tarifa tregtare.
Sipas bankës, nëse Brexit shkon në mënyrë perfekte, ekonomia ka gjasa të rritet me 1.75% në vit. Institucioni deklaroi se ekonomia ndodhet në kapacitet të plotë dhe inflacioni do të zbresë nga 2.4% drejt objektivit prej 2% pas 3 vitesh.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.