Banka e Japonisë shton fleksibilitetin – Do të ndryshojë blerjet në treg të hapur, interesat e ulëta qendrojnë
Banka e Japonisë ka marrë masa për ta bërë programin gjigant të stimujve më fleksibël dhe premtoi se do të mbajë normat e interesit në nivele rekord të ulëta për momentin, duke reflektuar projeksionet se duhet ende kohë që inflacioni të arrijë objektivin prej 2%. Vendimi vuri në dukje vështirësitë e bankës qendrore të ekonomisë së tretë më të madhe në botë, ndërkohë që inflacioni i ulët po e detyron që të mbajë programin e stimujve pavarësisht rritjes së kostove.
Ndryshimi tregon se Guvernatori Haruhiko Kuroda po monitoron ndikimin e politikave lehtësuese në disa pjesë të ekonomisë, si tregjet financiarë dhe sistemin bankar. Përpara lajmërimit të vendimit, tregjet spekulonin se banka qendrore mund të jepte udhëzime për rritjen e normave të interesit e për rrjedhojë, interesat e borxhit qeveritar pësuan rënie.
Në takimin dy-ditor të politikave, Banka e Japonisë vendosi të mbajë normat afat-shkurtra të interesit në -0.1% dhe premtoi se do të orientojë yield-in 10-vjeçar të qeverisë në 0%. Megjithatë, institucioni bëri të ditur se do të lejojë normat afat-gjatë të interesit që të luhaten në varësi të zhvillimeve ekonomike dhe se do t’i shtojë fleksibilitetin programit të blerjes së obligacioneve.
Tregjet e aksioneve në Japoni frenuan humbjet pas lajmërimit të bankës, ndërsa jeni ra ndjeshëm, pasi banka nuk lajmëroi ndryshime të politikave. Indeksi i titujve të kapitalit në Japoni, Nikkei, u tregtua në performancë pozitive ndërsa jeni ra në 111.33 kundër dollarit amerikan.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.