Banka e Rusisë ul normën e interesit – Synon që të përfundojë ciklin lehtësues në fund të 2018-ës
Banka Qendrore e Rusisë ka ulur normën bazë të interesit me 0.25% dhe deklaroi se do të përfundojë ciklin e lehtësimit monetar këtë vit, pavarësisht rreziqeve nga proteksionizmi tregtar.
Rusia ka nevojë për norma më të ulëta të interesit që të nxisë rimëkëmbjen ekonomike nëpërmjet huadhënies së lirë dhe norma e ulët e inflacionit nënkupton se ka ende vend për të lehtësuar politikat.
Duke bërë ndërhyrjen e dytë për këtë vit, banka uli normën e interesit në 7.25% nga 7.5%, në përputhje me pritshmëritë e tregjeve.
Institucioni ka nisur reduktimin e interesave menjëherë pas rritjes emergjente në 17% gjatë 2014-ës, me qëllim mbrojtjen e ekonomisë ndërkohë që rubla u zhvlerësua ndjeshëm dhe sanksionet perëndimore cënuan vendin.
Që prej atëherë, banka qendrore ka menaxhuar frenimin e inflacionit që qëndronte në nivele dyshifrorë, ndërkohë që arriti në 2.2% gjatë Shkurtit.
Inflacioni është ngadalësuar poshtë objektivit të bankës prej 4%, duke i dhënë politikëbërësve hapësirë që të ulin normën bazë të interesit deri sa të arrijë në vargun 6-7%, që shihet si neutral. “Shohim që ka mundësi për të ulur normën bazë të interesit.
Ne presin që të nisim politikat monetare neutrale më vonë gjatë vitit”, tha Guvernatorja Elvira Nabiullina.
Ajo shtoi se rreziqet e proteksionizmit tregtar janë rritur, por ndikimi direkt në ekonominë ruse ka qenë i limituar. Guvernatorja tha se rezervat ndërkombëtare të Rusisë mund të arrijnë në 500 miliardë dollarë, pa ndërhyrje në valutë nga banka qendrore.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.