Banka e Shqipërisë, ekspozitë 2-ditore në Gjirokastër për prezantimin e kartëmonedhave të reja
Në kuadër të fushatës për prezantimin e serisë së re dhe hedhjes në qarkullim të dy kartëmonedhave të reja, Banka e Shqipërisë, organizon ekspozitën 2-ditore në Gjirokastër me qëllim informimin e publikut mbi pamjen e re dhe elementet e sigurisë së dy kartëmonedhave 200 Lekë dhe 5000 Lekë, që u hodhën në qarkullim në datë 30 shtator 2019.
“Kjo ekspozitë u çel sot, në datë 14 nëntor 2019, nga Zëvendësguvernatorja e Parë e Bankës së Shqipërisë, zj. Luljeta Minxhozi, në prani të Prefektit të Qarkut Gjirokastër, Astrit Aliaj dhe shumë përfaqësuesve të tjerë të pushtetit lokal, botës së akademisë dhe biznesit, nxënësve dhe mësuesve. Banka e Shqipërisë fton gjithë të interesuarit të vizitojnë ekspozitën lëvizëse në ambientet e Hotel Cajupi Gjirokaster,Albania, (ish-turizmi), në datat 14–15 nëntor 2019, në orarin 09:00 – 13:00 dhe 15:00 – 19:00.
Në këtë ekspozitë do të keni mundësinë të njiheni me imazhet, personalitetet simbol dhe elementet e sigurisë së serisë së re të kartëmonedhave, e në veçanti të atyre 200 Lekë dhe 5000 Lekë. Mos harroni të merrni edhe fëmijët me vete! Ekspozita edukative ofron për ta një kënd interaktiv, ku mund të mësojnë duke u argëtuar përmes lojërave të ndryshme” njofton Banka e Shqipërisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.