Banka e Shqipërisë njofton mbledhjen e Shtatë të Komitetit Kombëtar të Sistemit të Pagesave – Në diskutim masat e realizuara deri më tani
Komiteti Kombëtar i Sistemit të Pagesave (KKSP) ka zhvilluar online mbledhjen e tij të shtatë, nën drejtimin e Kryetares së tij, Luljeta Minxhozi, Zëvendësguvernatore e Parë e Bankës së Shqipërisë.
Të pranishëm ishin anëtarët e Komitetit Kombëtar të Sistemit të Pagesave, përfaqësues nga: Shoqata Shqiptare e Bankave; Komiteti Ndihmës i Pagesave, Kartave, Digjitalizimit dhe Kanaleve Alternative, i krijuar rishtazi nga Shoqata Shqiptare e Bankave me qëllim mbështetjen e objektivave të KKSP-së; përfaqësues nga Ministria e Financave dhe Ekonomisë; Autoriteti i Mbikëqyrjes Financiare (AMF), Shoqata Mikrofinanca Shqiptare dhe aktorë të tjerë të tregut. Gjithashtu, me qëllim mbështetjen e tematikave të diskutuara gjatë mbledhjes, të pranishëm ishin dhe përfaqësues nga Banka Botërore.
Në fjalën e saj hyrëse, Kryetarja e Komitetit Kombëtar të Sistemit të Pagesave, Minxhozi, falënderoi pjesëmarrësit për mbështetjen aktive në përmbushjen e objektivave të Strategjisë Kombëtare të Pagesave me Vlerë të Vogël (2018-2023), e reflektuar në pritshmëritë shumë optimiste për përmbushjen e këtyre synimeve, pavarësisht faktit se nga pikëpamja kohore jemi ende në gjysmën e rrugëtimit.
Në vijim, Kryetarja bëri një përmbledhje të masave të realizuara deri më tani, duke u fokusuar si në zhvillimet ligjore e rregullative, të tilla si: hartimi i akteve nënligjore në zbatim të ligjit “Për shërbimet e pagesave”, miratimi i kuadrit rregullativ për debitimin direkt dhe hartimin e projektligjit “Për llogarinë bazike”, ashtu edhe në zhvillimet infrastrukturore. Në këtë drejtim, Minxhozi i kushtoi vëmendje projektit “Për shlyerjen e pagesave në Euro brenda vendit”, i cili tashmë është finalizuar nga pikëpamja infrastrukturore dhe rregullative, dhe në fillim të vitit 2022, do të jetë funksional dhe i disponueshëm për aktorët e tregut.
Më tej, Kryetarja vendosi edhe një herë theksin mbi rëndësinë që ka edukimi financiar për materializimin sa më efektiv të masave të ndërmarra deri më tani dhe për arritjen e objektivave në vijim. Në këtë kontekst, mbledhja vijoi me analizimin e masave të marra në kuadër të hartimit të Strategjisë Kombëtare për Edukimin Financiar. Aktorët e përfshirë në këtë nisëm – Banka e Shqipërisë, Autoriteti i Mbikëqyrjes Financiare, Shoqata Shqiptare e Bankave dhe Shoqata Mikrofinanca Shqiptare – shpjeguan masat e marra nga ana e tyre dhe këndvështrimet në lidhje me përqasjen dhe objektivat e strategjisë. Më tej u bë një prezantim i detajuar nga Banka Botërore, si partneri kryesor ndërkombëtar që po asiston aktorët shqiptarë në hartimin e kësaj strategjie. Prezantimi u fokusua mbi detaje specifike të kësaj strategjie si misioni, vizioni, nevoja dhe arsyet e strategjisë, aktorët, koordinimi dhe bashkëpunimi ndërinstitucional, si dhe burimet e financimit të kësaj strategjie.
Në vazhdim, përfaqësues të Bankës së Shqipërisë prezantuan arritjet e deritanishme, si dhe objektivat për t’u përmbushur në vazhdim në lidhje me Strategjinë Kombëtare të Pagesave me Vlerë të Vogël, si dhe prekën çështje të ndryshme si projekti i debitimit direkt, projekti i shlyerjes së transaksioneve në euro brenda vendit, koncepti i bankës së hapur (open banking) etj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.