Banka Qendrore e Rusisë ul normën bazë – Tashmë në 17%, sinjalizon lehtësim të mëtejshëm!
Banka qendrore ruse uli ndjeshëm normën e saj bazë të interesit në 17% dhe tha se shkurtimet e ardhshme ishin të mundshme, pasi hapat emergjente kishin frenuar rrezikun për stabilitetin financiar, kishin rikthyer depozitat në banka dhe ndihmuan në kufizimin e kërcënimit të inflacionit.
Muajin e kaluar, banka qendrore mbajti normën e saj bazë të interesit në 20% pas një rritjeje masive emergjente në shkurt dhe tha se do të fillonte të blinte obligacionet e qeverisë, duke paralajmëruar për një rritje të afërt të inflacionit dhe tkurrje ekonomike.
Por, të premten, banka qendrore uli papritur normën bazë me 300 pikë bazë, duke marrë vendimin përpara mbledhjes së rregullt të caktuar për 29 prill. Banka deklaroi se masa reflektonte një ndryshim në bilancin e rreziqeve të rritjes së përshpejtuar të çmimeve të konsumit, një rënie të aktivitetit ekonomik dhe kishte frenuar rrezikun për stabilitetin financiar.
“Rreziqet e stabilitetit financiar janë ende të pranishme, por janë frenuar për momentin edhe për shkak të masave të miratuara të kontrollit të kapitalit. Ka një hyrje të qëndrueshme të fondeve në depozita”, theksohet në deklaratën e Bankës Qendrore.
Inflacioni vjetor në Rusi u përshpejtua në 16.7% nga 1 prilli, më i larti që nga marsi 2015 dhe nga 15.66% një javë më parë, pasi rubla e paqëndrueshme shkaktoi rritje të çmimeve mes sanksioneve të paprecedentë perëndimore. Sipas Bankës Qendrore, inflacioni do të vazhdojë të rritet, por të dhënat më të fundit javore treguan një ngadalësim të normës së rritjes së çmimeve edhe falë forcimit të rublës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.