Bankat, 8.4 milionë euro fitim vetëm për një muaj

Vetëm gjatë muajit korrik të këtij viti, të gjitha bankat komerciale në vend kanë arritur të krijojnë një fitim neto prej jo më se 8.4 milionë eurosh.

Duke u bazuar në të dhënat zyrtare të Bankës Qendrore të Kosovës shihet se nga fillimi i viti e deri më tani fitimi i bankave ka arritur në 54 milionë euro e ku në raport me periudhën e njëjtë të vitit të kaluar fitimi i bankave është më i lartë për 7.3 milionë euro.

Gjithnjë duke u bazuar në të dhënat zyrtare të BQK-së shihet se gjatë 7 muajve të parë të këtij viti të të ardhurat totale të bankave kanë qenë 139.2 milionë euro, ku nga kjo shumë 101.1 milionë euro kanë qenë të ardhura nga interesi.

Po ashtu, gjatë kësaj periudhe kohore shpenzimet e bankave kanë qenë 85.1 milionë euro e ku nga kjo shumë 9.8 milionë janë shpenzime të interesit, derisa pjesa tjetër prej 59 milionë eurosh janë shpenzime administrative, transmeton zeri.info.

Duke u bazuar në të dhënat e BQK-së shihet se deri në fund të muajit korrik të këtij viti vlera e kredive ka arritur në 2.3 miliardë euro e ku nga kjo shumë 865.5 milionë euro janë kredi për ekonomitë familjare, derisa pjesa tjetër prej 1.5 miliard eurosh janë kredi për ndërmarrje.

Në raport me periudhën e njëjtë të vitit paraprak shuma e kredive është rritur për 9,6 për qind e ku nga kjo rritja për ekonomitë familjare është 12,4 për qind, derisa rritja për ndërmarrje është 8,1 për qind.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.