Bankat Amerikane kalojnë provën – I nënshtrohen testimit më të ashpër në histori të Rezervës Federale
Bankat më të mëdha në SHBA, pritet të hedhin më shumë para në dividentë, riblerje të aksioneve dhe investime të biznesit, pas kalimit të stres testit vjetor nga rregullatorët, që tregoi se janë të mbuluara mirë me kapital për të përballuar një recesion. Edhe pse 35 huadhënësit më të mëdhenj do të pësojnë humbje totale në 578 miliardë dollarë në skenarin më të keq të simuluar nga Rezerva Federale, niveli i kapitalit me cilësi të lartë do të jetë më i madh se kufiri që rregullatorët kërkojnë dhe sipër niveleve që ishte përpara krizës financiare.
Testimi i parë kontrollon nëse bankat përputhen me kërkesat minimale të metodologjisë së Rezervës Federale. Huadhënësit mund të dështojnë në testimin më të ashpër që do të zhvillohet javën e ardhshme, që përfshin faktorë operacionalë si manaxhimi i riskut. Rezerva Federale i prezantoi provat e rezistencës gjatë krizës financiare, për t’u siguruar mbi pozitën e industrisë bankare, pasi nëpërmjet huadhënies, konsiderohen thelbësore për ekonominë. Që prej testit të parë në vitin 2009, bankat kanë reduktuar humbjet, përmirësuar portofolet e kredisë dhe rritur fitimet.
Bankat që i nënshtrohen provës kanë fuqizuar gjithashtu bilancet e tyre, duke shtuar më shumë se 800 miliardë dollarë kapital të cilësisë së lartë, sipas Fed. Filialet amerikane të 6 bankave të huaja, përfshirë Deutsche Bank, Credit Suisse dhe UBS, janë gjithashtu subjekt i testimit. Desutche Bank, operacionet e të cilës kanë qenë në mbikëqyrje të ashpër rregullatore, kaloi gjithashtu provat për kapitalin minimal të kërkuar, së bashku me UBS dhe Credit Suisse.
Banka të tjera të testuara përfshijnë JPMorgan, CitiGroup, Bank of America, Wells Fargo si dhe bankat e Wall Street si Goldman Sachs dhe Morgan Stanley. Rezerva Federale rrit vështirësinë e testit ndërkohë që mjedisi ekonomik përmirësohet. Këtë vit, testimi përfshiu një recesion të ashpër global, me papunësinë në SHBA që u rrit në 10% dhe ndryshime të mprehta në kurbën e yieldit të titujve të Thesarit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.