Bankat britanike përballë Brexit – S&P flet për zhvlerësim, paralajmëron për klerimin e pagesave në euro

Bankat britanike mund të përballen me një zhvlerësim të kreditit nëse ndodh një Brexit i ç’rregullt, ndërkohë që kjo do të shkaktonte një krizë të brendshme politike dhe tkurrje ekonomike, sipas Standard & Poor’s.   Agjencia bëri të ditur se bilancet dhe të ardhurat e bankave britanike mund të ofrojnë një mbrojtje të mirë kundër skenarit negativ të Brexit. Por, Agjencia shtoi se vlerësimi aktual i kreditit dhe perspektivat do të ndryshojnë.  Britania dhe Bashkimi Europian pritet të arrijnë një marrëveshje për divorcin përpara samitit të javës së ardhshme.

S&P deklaroi se pret një dalje të rregullt në muajin Mars, që do të ndiqet nga një periudhë transpozicioni deri në vitin 2020. Megjithatë,  pavarësisht kësaj, shumë institucione financiare kanë arritur në pikën ku nuk ka më kthim mbrapsht dhe kanë krijuar baza në Bashkimin Europian, për të shmangur goditjet.   Edhe nëse ndodh një Brexit i rregullt, do të ketë presione te bankat që të zhvendosin klerimin e pagesave të denominuara në euro nga Londra në Bashkimin Europian, sipas Standard & Poor’s.

Fitch Ratings deklaroi se bankat britanike janë të financuara mirë për të përballuar Brexit pa marrëveshje, por mund të përballen me sfida nëse tregjet ndërpriten për një periudhë të gjatë.  “Vlerësimet e tyre duhet t’i bëjnë ballë përkeësimit ekonomik në skenarin më të keq”, deklaroi Fitch.  Standard & Poor’s përsëriti paralajmërimet e  Bankës së Anglisë se tregjet derivativë mund të përballen me ndërprerje nga skenari negativ i Brexit, nëse BE nuk lejon konsumatorët europian që të vazhdojnë të përdorin shtëpinë britanike të klerimit (LCH), që ndërmerr pjesën më të madhe të kontratave “swap” të denominuiara në euro.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.