Bankat daneze do tarifojnë të pasurit : Normë interesi negative për depozitat mbi 1.1 milionë dollarë
Pas Jyske Bank, një tjetër bankë daneze ka ndërmarrë veprimin drastik, atë të normës negative të interesit për depozitat e mëdha. Pra, Sydbank, që është edhe banka e tretë më e madhe në vend, do të veprojë njësoj si Jyske bank, duke bërë që ata që kanë llogari mbi 1.1 milionë dollarë në bankë, t`i paguajnë bankës një normë prej 0.6%.
Vendimi është bërë i ditur nga një deklaratë zyrtare e bankës. Vetë banka shpjegon se diçka e tillë vjen për shkak të normave negative të interesit nga ana e bankës qendrore, dhe që po dëmtojnë të ardhurat e bankës. Duke qenë se kjo gjë parashikohet të zgjasë për disa vite, banka ka vendosur të ndërhyjë, duke tarifuar më të pasurit për depozitat e tyre. Banka në fjalë, Sydbank bëri publike edhe të dhënat e tremujorit të dytë, ku rezultatet janë nën parashikimet. Institucioneve huadhënëse në Danimarkë i`u është dashur të përballen me normat negative të interesit për një kohë më të gjatë se koleget e tyre europiane.
Banka qendrore daneze uli normat poshtë zeros në mesin e vitit 2012. Edhe vendet e tjera nordike po mendojnë të ndjekin shembullin e dy bankave daneze, duke qenë se vuajnë nga e njëjta problematikë, por deri tani e kanë mohuar diçka të tillë.
Roel Korkuti/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.