Bankat në Afganistan rihapen pjesërisht – Ofrojnë vetëm tërheqje “cash” prej 200 USD në ditë për person
Tregtarët në kryeqytetin e Afganistanit, Kabul, bënë thirrje që bankat e mbyllura të rihapen plotësisht sa më shpejt, për shkak se situata po përkeqësohet çdo ditë e më shumë. Njerëzit janë dyndur përpara bankave dhe bankomateve, një ditë pasi zëdhënësi i talebanëve, Zabihullah Mujahid, deklaroi se bankat do të rihapen së shpejti.
Çmimet e produkteve kryesore, si mielli, vaji dhe orizi janë rritur mes 10 dhe 20%, që kur talebanët morën kontrollin e vendit. Me shumicën e bankave të mbyllura, shumë njerëz e kanë të pamundur të kenë akses në kursimet e tyre. Talebanët kanë emëruar një shef në detyrë të Bankës Qendrore të Afganistanit, për të ndihmuar në zbutjen e problemeve ekonomike në rritje.
Edhe përpara se talebanët të merrnin kryeqytetin të dielën e kaluar në 15 gusht, kushtet po përkeqësoheshin, pasi përparimi i shpejtë i kryengritësve nëpër qytetet krahinore e rrëzoi ndjeshëm monedhën vendase përballë dollarit amerikan, duke rritur çmimet e ushqimeve bazë në niveelin më të lartë në histori. Shumë banka dhe institucione financiare u mbyllën më 15 gusht, menjëherë pasi presidenti i Afganistanit, Mohammad Ashraf Ghani, u largua nga vendi ndërsa talebanët morën pushtetin.
Gjithsesi, një numër i vogël bankash rifilluan operacionet të enjten, vetëm për tërheqjen e parave “cash”. Në të njëjtën kohë, bankat kanë vendosur kufizime strikte për sasinë e parave që mund të tërhiqen, në rreth 200 dollarë për person në ditë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.