Bankat më optimiste – Rritet kredia afatgjatë te biznesi dhe individët
Sistemi bankar po rrit kreditimin afatgjatë. Të dhënat e vitit 2017 tregojnë një ndryshim të rëndësishëm në kursin e kreditimit të ekonomisë. Huatë afatshkurtra dhe afatmesme, me maturim në më pak se pesë vjet janë pakësuar, ndërsa bankat po kreditojnë më shumë në afate më të gjata maturimi.
Sipas statistikave nga Shoqata Shqiptare e Bankave, kreditë afatgjata, me maturim më të gjatë se pesë vjet, në nëntor 2017 arritën në afro 293 miliardë lekë, nga 269 miliardë lekë që ishin në fillim të vitit.
Rritja e kreditimit afatgjatë është në vetvete një sinjal pozitiv, sepse dëshmon që bankat janë të gatshme të marrin përsipër më shumë rrezik në horizonte gjata kohore. Në mënyrë më specifike, rritja e maturitetit mesatar të portofolit lidhet edhe me zhvillimet sektoriale të huadhënies dhe me qëllimet e përdorimit të kredisë.
Dhënia e më shumë kredive afatgjata tregon se bankat kanë mbështetur më shumë projekte të reja investimi. Portofoli i kredive afatgjata për biznesin ka arritur në 153 miliardë lekë, në rritje me 15 miliardë lekë që nga fillimi vitit.
Ndërkohë, në rënie janë kreditë afatshkurtra në formë paradhëniesh bankare apo kapitali qarkullues. Një tendencë të ngjashme po ndjek edhe kreditimi i individëve, ku kreditë afatgjata kanë arritur në 134 miliardë lekë, shtatë miliardë lekë më shumë krahasuar me fillimin e vitit.
Tek individët, zgjerimi i kreditimit afatgjatë lidhet kryesisht me financimet për blerjen e pasurive të paluajtshme. Normat e favorshme të interesit që ofrojnë bankat kanë sjellë rritje të ndjeshme të kreditimit në këtë segment.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.