Bankat, pak dëme nga tërmeti/ Nuk ka ndikuar as planet e biznesit për vitin 2020!

Tërmeti i nëntorit të vitit të kaluar nuk ka shkaktuar pasoja të rëndësishme në portofolin e kredisë së sistemit bankar. Adja Angjeli, drejtore e menaxhimit të shitjeve në degë në Credins Bank, thotë se nga verifikimet e deritanishme me klientët, efektet e tërmetit kanë qenë minimale. Në pak raste janë konstatuar dëme të kolateralit dhe janë ndjekur procedurat e dëmshpërblimit me kompanitë që kanë siguruar pronën.

Sipas saj, në tërësi viti 2019 ishte mjaft pozitiv për segmentin e retail. Credins Bank raporton një rritje me 13% të portofolit të kredisë në segmentin retail, ndërsa për produktet e individëve rritja ka qenë edhe më e lartë, me 15%. Zonja Angjeli thotë se segmenti retail do të ketë prioritet për bankat edhe në vitin 2020, sepse paraqet rrezik më të ulët, por edhe sepse kërkesa e individëve dhe bizneseve të vogla për kredi bankare është në rritje.

Në planet e tyre të biznesit për vitin 2020, bankat nuk kanë parashikojnë ndikime dramatike të situatës së post-tërmetit. Zonja Angjeli mendon se tërmeti nuk pritet të ketë ndikim afatgjatë në tregun e pasurive të paluajtshme dhe as në ecurinë e kredisë hipotekore, sidomos në Tiranë. Objektivat e rritjes për këtë vit janë të ngjashme me vitin e kaluar.

Në vitet e fundit, bankat kanë zgjeruar ndjeshëm kreditimin në segmentin retail dhe veçanërisht huadhënien për individët. Sipas bankës së Shqipërisë, në fund të nëntorit 2019, portofoli i kredisë për individë arriti në 197 miliardë lekë, në rritje vjetore me 7%. Bankat kanë si objektiv afatgjatë një ulje të përqendrimit të kreditimit në segmentin e biznesit dhe një shpërndarje më të mirë të rrezikut kreditor. Nga ana tjetër, normat e ulëta historike të interesit vazhdojnë të mbështesin një rritje të huamarrjes nga familjet, sidomos me qëllim blerjen e banesave. Kredia për blerjen e banesave e dhënë nga sistemi bankar shqiptar ka arritur në 117 miliardë lekë ose rreth 950 milionë euro. Sipas të dhënave nga Banka e Shqipërisë, deri në fund të nëntorit ky portofol u rrit me 6.4% në raport me fillimin e vitit 2019.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.