Bankat presin rritje të kreditimit në T2 – Për individët dhe për bizneset. Edhe T1 ka pasur kërkesë të lartë
Banka e Shqipërisë ka publikuar vrojtimin e aktivitetit kreditues për tremujorin e parë të vitit, që vjen në formën e një anketimi të 10 bankave më të mëdha në vend, duke sjellë jo vetëm ecurinë e kreditimit në tre muajt e parë të vitit, por edhe pritshmëritë për tre muajt e dytë.
“Sipas këndvështrimit të bankave tregtare, standardet e kreditimit për bizneset u shtrënguan në tremujorin e parë të vitit 2021, si në terma të madhësisë së biznesit, ashtu edhe të qëllimit të përdorimit të kredisë. Në të njëjtën linjë me to, bankat shtrënguan dhe kushtet e termat e kreditimit për kreditë e reja akorduar bizneseve, si në komponentët çmim ashtu edhe në ata joçmim. Kërkesa për kredi e bizneseve u shfaq në rritje në segmentin e biznesit të madh dhe në rënie në atë të mesëm e të vogël. Në terma të qëllimit të përdorimit të kredisë, kërkesa u vlerësua më e lartë, si për kreditë dhënë me qëllim financimin e investimeve, ashtu edhe ato për mbulimin e nevojave për likuiditet”, nënvizon institucioni.
Në gjykimin e bankave, në tremujorin e parë të vitit, standardet e së bashku me to edhe kushtet e termat e kreditimit për individët u lehtësuan. Në këtë tremujor u vërejt një kërkesë e shtuar për kredi nga individët, si në kreditë konsumatore, ashtu edhe në ato për blerjen e banesave.
Në tremujorin e dytë të vitit 2021 ndërkohë, bankat synojnë të mbajnë të pandryshuara standardet e kreditimit për bizneset. Nga ana tjetër, kërkesa për kredi pritet të jetë më e lartë, e përqendruar kryesisht tek biznesi i madh dhe për kreditë me qëllim mbulimin e nevojave për likuiditet. Standardet e kreditimit për individët priten të lehtësohen më tej në tremujorin e dytë të vitit 2021, si në kreditë konsumatore ashtu edhe ato në blerjen e banesave. Kërkesa e individëve për kredi pritet të jetë më e lartë në të dyja kategoritë.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.