Bankierët optimistë për ekonominë – The Banker: Ja faktorët që pritet të nxisin huadhënien  

Bankat Shqiptare pritet të rinisin huadhënien drejt sektorit korporativ, ndërkohë që qeveria përpiqet të ulë kreditë me probleme dhe reforma e sistemit gjyqësor vazhdon të përmirësojë mjedisin e biznesit dhe rrisë shpresat e një të ardhme në Bashkimin Europian, shkruan prestigjiozja britanike, The Banker.

Artikulli flet për vështirësitë e sistemit bankar shqiptar pas krizës financiare, si rritja e kredive me probleme në 25% në Shtator të 2014-ës dhe ngurrimin e disa bankave në zgjerimin e huasë.

Edhe pse është bërë progres në reduktimin e tyre dhe norma pritet të bie poshtë 10%-shit deri në fund të 2018-ës, bankat janë bërë më strikte në kërkesat për të dhënë hua.

“Bankat kanë nguruar në rritjen e huasë drejt korporatave të mëdha,  kështu që nuk ka patur ndonjë investim të madh nga sektori korporativ”, tha Guvernatori i Bankës së Shqipërisë, Gent Sejko.

Sipas ekspertëve praktikat konservatore të bankave në huadhënie, të drejtuara nga zyrat qendrore në vende të tjera, po frenojnë rritjen ekonomike të vendit. Fondi Monetar Ndërkombëtar projekton një rritje me 3.7% të ekonomisë këtë vit dhe tjetrin.

Kredia drejt sektorit privat të brendshëm qëndron në vetëm 35% të PBB, krahasuar me mbi 50% te vendet e rajonit. Sipërmarrjet e vogla e të mesme e kanë të vështirë aksesin në financim.

Sipas përfaqësueses së Bankës Botërore në Shqipëri, Maryam Salim, ndër faktorët kryesorë që pengojnë aksesin në financim të këtyre janë; informaliteti i lartë në 60% të PBB, mungesa e eksperiencës së bankave në shërbimin e segmenteve më të vogla e të rrezikshme të ekonomisë si dhe mungesa e diversifikimit në provigjonimin e financimit nga institucionet financiare jo-banka.

Sipas saj, mënyra më e mirë për të ndihmuar këto sipërmarrje është zhvillimi i institucioneve financiare jo-bankare dhe rritja e përfitueshmërisë dhe besueshmërisë së kompanive të vogla.

Megjithatë, sipas revistës britanike, pavarësisht reformave strukturore që i nevojitën sistemit bankar dhe ekonomisë shqiptare, bankierët janë optimist mbi të ardhmen.

Sipas kryetarit të Shoqatës Shqiptare të Bankave, Silvio Pedrazzi, Shqipëria ofron disa mundësi të pashfrytëzuara ende, veçanërisht në energjinë e rinovueshme, turizëm dhe manifakturë.  Ai shton se vendndodhja e bën Shqipërinë një pikë hyrje për Ballkanin dhe për tregtinë me vendet europiane.

“Në një kohë që teknologjia po zhvillohet me ritme të shpejta, sistemi bankar mund të zgjerohet nëpërmjet dixhitalizimit, kështu që bankat në Shqipëri mund të ofrojnë të njëjtat shërbime moderne dhe inovative si vendet e tjera”, tha kreu ekzekutiv i Raiffeisen në Shqipëri, Christian Canacaris, duke shtuar se nisja e negociatave të anëtarësimit me BE, do të sjellin më shumë investime të huaja direkte drejt vendit.

Bankat pritet të jenë në një pozitë të fortë financiare,  duke ndjekur valën e fundit të konsolidimit dhe duhet të shfrytëzojnë mundësitë në të ardhmen, kryesisht kur anëtarësimi në BE të bëhet realitet.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.