Bankingu nga interneti – Rritje e lartë e veprimeve dhe volumeve

Veprimet bankare përmes internetit janë rritur ndjeshëm në tremujorin e parë të këtij viti. Sipas të dhënave nga Banka e Shqipërisë, për tremujorin e parë të këtij viti, numri i transaksioneve online arriti në mbi 162 mijë.

Kjo shifër është 41% më e lartë krahasuar me tremujorin e parë të vitit të kaluar. Rritja është e dukshme edhe në volumin e transaksioneve. Vlera e veprimeve bankare përmes sistemit për tre muajt e parë të vitit arriti në afro 40 miliardë lekë, 60% më shumë krahasuar me të njëjtën periudhë të vitit të kaluar.

Modernizimi i shërbimeve bankare dhe përdorimi në rritje i teknologjive në shoqërinë shqiptare po ndihmon në përhapjen e shërbimeve të bankingut në distancë. Sot 12 nga 16 banka tregtare në Shqipëri ofrojnë shërbime të internet banking.

Sipas Bankës së Shqipërisë, llogaritë bankare të aksesueshme nga interneti në fund të vitit të kaluar ishin rreth 209 mijë. Vlerësohet se rreth 86% e llogarive të lidhura me internetin i takojnë individëve.

Pjesa më e madhe e veprimeve bankare në distancë kryhen nga individët, ndërsa në volume mbizotërojnë transaksionet e bizneseve, që prekin vlera më të larta.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.