Bankingu nga shtëpia – Pagesat arrijnë vlerë rekord për vitin 2017

Veprimet e bankingut nga shtëpia kanë shënuar një vlerë rekord për vitin e kaluar. Sipas të dhënave nga Banka e Shqipërisë, vlera totale e pagesave përmes internetit apo telefonit arriti në afro 551 miliardë lekë, në rritje me 60% krahasuar me vitin 2016.

Rritja kishte përmasa të konsiderueshme edhe në numër transaksionesh, që arriti në 2.6 milionë, në rritje me 26% krahasuar me vitin 2016. Modernizimi i shërbimeve bankare dhe përdorimi në rritje i teknologjive po ndihmon në përhapjen e shërbimeve të bankingut në distancë.

Pjesën më të madhe të veprimeve bankare në distancë e zënë transaksionet përmes internet banking. Numri i llogarive bankare të lidhura me internet banking ka arritur 322 mijë.

Sipas të dhënave nga Banka e Shqipërisë, përdorimi i internet banking gjatë vitit 2017 u rrit me 54%. Përdorimi i internet banking është rritur për të nëntin vit radhazi, ndërsa rreth 88% e llogarive të lidhura me internetin i takojnë individëve.

Mbështetur në numrin e llogarive të lidhura me internetin, vlerësohet se në Shqipëri shërbimet e pagesave në distancë i përdorin rreth 11% e popullsisë, në rritje të ndjeshme prej nivelit 7% të vitit 2016.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.