Komisioni Europian propozoi një plan 2-vjeçar këtë javë për ngushtimin e hendekut gjinor në paga, pasi u identifikua pak përmirësim në 5 vitet e fundit.  Plani cakton 8 rekomandime për vendet e Bashkimit Europian, për të siguruar se gratë janë të trajtuara në mënyrë të barabartë në vendin e punës.

Propozimi përfshin caktimin e sanksioneve minimale për kompanitë që nuk ofrojnë paga të barabarta, si dhe monitorimin e politikave të diversitetit gjinor në kompanitë më të mëdha të Europës.

Komisioni synon që masat të adaptohen deri në fund të 2019-ës, kur mandati aktual i institucionit të mbarojë. “Nuk kemi parë progres në 10 vitet e fundit. Ne nuk po reduktojmë bindshëm hendekun gjinor pavarësisht përpjekjeve”, tha Vera Jourova, shefja e barazisë gjinore e Komisionit.

Krahu ekzekutiv i Bashkimit Europian raportoi se gratë në vendet anëtare fitojnë 16.3% më pak se meshkujt dhe se kjo shifër nuk është reduktuar në 5 vitet e fundit. Paralelisht, sondazhet e fundit tregojnë se 90% e europianëve mendojnë se është e papranueshme që gratë të paguhen më pak se burrat për të njëjtën punë.

“Disa gjëra po ecin mbrapsht në shumë pjesë të botës. Njerëzit mendojnë se ne kemi një shoqëri të barabartë, por kjo nuk është e vërtetë”, tha zv/presidenti i komisionit Frans Timmermans.

Në vitin 2012, Komisioni propozoi legjislacionin që kërkon që të paktën 40% e pozicioneve jo-ekzekutive në kompanitë e listuara të zihen nga gratë në një periudhë 7-vjeçare.

Propozimi nuk kaloi për shkak se nuk fitoi pëlqimin e vendeve anëtare. Britania dhe Gjermania e kundërshtuan këtë kuotë.

Presidenti i Komisionit, Jean-Claude Juncker caktoi një objektiv në 2014-ën, një përfaqësim prej 40% të femrave në pozicionet e larta e të mesme të manaxhimit në Komision deri në 2019-ën.  Institucioni i BE-së raportoi se kjo shifër është rritur në 35%, nga 29% që ishte në vitin 2013.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.