Barnat antiviralë kundër Covid-19 / Administrata e Biden do të ofrojë 3.2 mld USD për zhvillimin e tyre

Shtetet e Bashkuara do investojnë 3.2 miliardë dollarë për zhvillimin e ilaçeve antivirale për të trajtuar Covid-19 dhe viruse të tjera që kanë potencial pandemie, sipas një lajmërimi të administratës së Biden.  Programi i ri, që quhet “Programi Antiviral për Pandemitë”, është një përpjekje qeveritare që shpejton provat klinike të barnave premtuese dhe për të zhvilluar trajtime të gjeneratës së re për Covid dhe viruse të tjera që mund të shkaktojnë pandemi në të ardhmen, sipas këshilluesit mjekësor të Shtëpisë së Bardhë, Anthony Fauci.   Nën këtë plan, Institutet Kombëtare të Shëndetësisë, do të vlerësojnë, japin prioritet dhe përshpejtojnë kandidatët antiviralë më prova klinike, si dhe do udhëzojnë kompanitë drejt rrugëtimit të zhvillimit të këtyre ilaçeve.   Fauci tha se vaksinat do vazhdojnë të jenë mjeti kryesor në arsenalin amerikan kundër Covid. “Antiviralët do të jenë plotësues ndaj vaksinave ekzistuese, veçanërisht për njerëzit me sëmundje të caktuara që mund të jenë me rrezik më të lartë”- tha ai.  Ndërkohë që vaksinat kanë qenë tejet efektive në uljen e infeksioneve në SHBA, autoritetet kanë thënë se vendi ka nevojë për më shumë trajtime, për njerëzit që janë të infektuar, ose për ata që kanë sistem të dobët imunitar dhe nuk reagojnë mirë ndaj vaksinave.   Disa trajtime për Covid ndodhen në zhvillim dhe mund të shpërndahen në SHBA deri në fund të vitit. Pfizer nisi në muajin Mars një provë klinike të fazës së parë, ku po teston një pilulë eksperimentale për të trajtuar Covid gjatë shenjave të para të sëmundjes.   Ilaçi është pjesë e një kategorie të barnave që quhen “ndaluesit e proteazës” dhe funksionon duke ndaluar një enzimë që virusi shfrytëzon për t’u replikuar tek qelizat njerëzore.  Ndaluesit e proteazës përdoren për të trajtuar edhe patogjenë të tjerë viralë, si HIV dhe Hepatitin C.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.