“Barometri 2020” për Ballkanin Perëndimor, Bregu: “Problem korrupsioni, qytetarët të shqetësuar për largimin e trurit dhe Covid-19”

Këshilli për Bashkëpunimin Rajonal publikoi edicionin e vitit 2020 të Barometrit për Ballkanin, që ndryshe nga herët e tjera, këtë vit solli edhe perceptimin dhe ndikimin e pandemisë Covid-19. Në prezantimin e gjetjeve, Sekretarja e Përgjithshme e Këshillit për Bashkëpunimin Rajonal, Majlinda Bregu, deklaroi se “largimi i trurit” nga vendet e Ballkanit po bëhet gjithmonë e më shumë një shqetësim për qytetarët, pasi 20% shqetësohen për këtë fenomen, ndërsa në vitin 2015 ky shqetësim ishte në 0%. Gjithashtu, shumica e të anketuarve e mbështesin bashkëpunim rajonal dhe integrimin në Bashkimin Europian.

“77% e qytetarëve të Ballkanit Perëndimor mendojnë se bashkëpunimi rajonal është i rëndësishëm, ndërsa 59% e të anketuarve mendojnë se anëtarësimi në BE është një gjë e mirë, rreth 20% më shumë se në vitin 2015. Njëkohësisht, rreth mbi 1/3 e qytetarëve të rajonit raportojnë se kanë shpenzuar më pak për faturat e telefonit, që kur hyri në fuqi marrëveshja rajonale e Roaming, rreth 1 vit më parë. Përsa i përket Covid-19, rreth 72% e qytetarëve të Ballkanit e  konsiderojnë shpërthimin e pandemisë si një kërcënim të madh për ekonomitë e tyre. 68% e njerëzve janë të shqetësuar për humbjen e vendit të punës dhe vetëm 1/3 janë të kënaqur me mënyrën se si qeveritë e tyre po i  sigurojnë njerëzit se nuk do të humbasin vendin e punës.

Ndërkohë, rreth 83% e qytetarëve të Ballkanit mendojnë se partitë politike janë më të korruptuarat, 80% për gjyqësorin, 79% për doganat, 76% për punonjësit e kujdesit shëndetësor dhe 76% për parlamentet. Për këtë arsye, Komisioneri i Bashkimit Europian për Fqinjësinë dhe Zgjerimin, Oliver Varhelyi, i bëri thirrje vendeve të Ballkanit të shpejtojnë reformat, sidomos lufta kundër krimit dhe korrupsionit.

Rruga e vendeve të Ballkanit Perëndimor është në Bashkimin Europian, por duhen realizuar reformat e rëna dakord me unionin. Pandemia e Covid-19 mbase i vonoi pak gjërat, por nxori më pah nevojën për bashkëpunim. Qeveritë e rajonit duhet të intensifikojnë luftën ndaj krimit të organizuar dhe korrrupsionit, pasi edhe perceptimi i qytetarëve për këto fenomene është i lartë.

I ftuar në këtë videokonferencë ishte edhe Wolfgang Ischinger, i cili mban postin e presidentit të Konferencës së Mynihut për Sigurinë. Ai tha se zgjidhja e problemeve në rajonin e Ballkanit Perëndimor ka qenë dhe do të jetë në axhendën e kësaj konference.

Lidion Kulla / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.