Basha me studentët e ekonomikut: “Praktika mësimore dhe subvencionim 100% të tarifave të studimit ”

Kryetari i PD Lulzim Basha ka zhvilluar një bashkëbisedim me studentët e Fakultetit të Ekonomisë. Gjatë këtij takimi Basha njohu studentët me prioritetet e qeverisë kur ai të vij në pushtet  duke theksuar se do ti kushtohet vëmendje subvencionimit 100% të  tarifave për 90% të studentëve që vijnë nga familje me të ardhura nën 640 mijë lekë  në muaj.

“Unë ju siguroj se si kryeministër i ardhshëm prioritet do të kenë praktikat mësimore për studentë, do kenë subvencionimi 100% i tarifave për 90% të studentëve që vijnë nga familje me të ardhura nën 640 mijë lekë  në muaj. Prioritet do të jetë programi ynë për subvencionimin e fermerëve me 100 milionë euro në vit. Prioritet për mua do të jetë taksa 9% që Shqipëria të jetë konkurruese me rajonin dhe të thithë investime të huaja. Prioritet për mua do të jetë rritja e pensioneve  dhe jo 10 oligarkët pranë qeverisë,  dhe ky është një objektiv i shpallur të cilit do t’i shkojmë deri në fund  me vendosmërinë më të madhe brenda kohës më të shkurtër të mundshme. Dhe meqë ju jeni student të ekonomisë, po ju them që ekzistojnë të gjithë mekanizmat për ta ndryshuar këtë realitet brenda 6 muajve të parë të qeverisjes tonë të ardhshme”, – garantoi Basha të rinjtë.

Të rinjtë shprehen shqetësimin e tyre edhe për mungesën e praktikave mësimore që nuk ofrohen dot nga sistemi arsimor, gjë që reflektohet më pas edhe në pamundësi përgatitje për tregun e punës. Basha iu bëri të ditur studentëve programin e PD për praktikat mësimore  duke premtuar stazhe të paguara për studentët.

“Kemi më shumë se 4 vite që i mëshojmë një përqasje që n e kemi hartuar me miqtë tanë gjermanë që janë pararojë e kësaj përqasjeje  në Europë, por që ka dhënë kaq shumë rezultate pozitive sa duhet të jesh totalisht i pandjeshëm, siç është kjo qeveri e ky kryeministër ndaj rinisë, që mos të kesh hedhur asnjë hap për ta zbatuar. Cila është kjo përqasje? Është përqasja e financimit të politikave për studentët. Çfarë kushton 10-15 milionë euro që ti ia jep Check-up-it dhe ndonjë tjetri në vit, do të mundësonte të paktën 10 mijë stazhe të paguara në vit, me 300 mijë lekë të vjetra në muaj, që është një pagesë simbolike por e mjaftueshme për të tërhequr 10 mijë studentët më të mirë në praktikë, nga të cilët 70-90% pas praktikës sigurojnë një vend pune.  A nuk ia vlen kjo? Për çfarë duhet qeveria, në qoftë se paratë e taksave tuaja dhe të prindërve tua, i bën rrush e kumbulla dhe nuk i dedikon për një veprim të tillë që sjell një leverdi kaq të madhe për shoqërinë! Jo 15 milionë, dhe aq kushton projekti, po dhe 10 herë më shumë po të kushtonte, është një nga gjërat më të justifikueshme para shqiptarëve. Si mund të ecë përpara një komb në qoftë se njerëzit për të cilët ka më shumë nevojë i largohen?”

Kreu i opozitës iu ka shpjeguar studentëve edhe projektin e tij për një qeverisje të vogël, duke eliminuar shpenzimet e fryra me punësime politike.

Nertila Doko / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.