Basha në Laprakë: 290 mijë shqiptarë në mjerim absolut, shesin gjakun për t’u siguruar fëmijëve 1 vakt ushqim në ditë
Kreu i Partisë Demokratike Lulzim Basha ka vijuar takimet me bazën, në degën 11 të Laprakës në Tiranës. Gjatë takimeve, kreu i PD-së u ka bërë thirrje qytetarëve që t’i bashkohen protestës së 27 janarit, si një reagim ndaj keqqeverisjes dhe varfërisë me të cilën përballen familjet shqiptare. Referuar njoftimit zyrtar, Basha tha se “290 mijë shqiptarë janë në mjerim absolut, shesin gjakun për t’u siguruar fëmijëve 1 vakt ushqim në ditë”.
Basha, tregoi gjendjen e rëndë ekonomike duke iu referuar historisë së dhimbshme publike të një babai, i cili ditën që nuk kishte gjetur punë tek “Ushtari i Panjohur”, kishte shitur gjak për të blerë bukën e fëmijëve.
“Gjendja e atij kryefamiljari është gjendja e mijëra prindërve shqiptarë, e 290 mijë shqiptarëve. Mjerim absolut. Nuk arrijnë dot të blejnë bukën e gojës për fëmijët e tyre. Po si mund t’i thotë vetes kryeministër, që shikon këtë gjendje dhe e zgjidh qesen, për çfarë? Për 400 milionë lek makina,”- u shpreh Basha.
Basha tha se në këtë situatë mjerimi për 300 mijë familje, qeveria u fal inceneratorëve miliona euro, 5.2 milionë vetëm për fabrikën e plehrave në zonën e Fierit, kundër të cilës po protestojnë banorët. Po ashtu, Basha vuri në dukje se rasti i ARMO-s është modeli i korrupsionit të kryeministrit ndaj edhe ftoi shqiptarët të marrin pjesë në protestë, si rruga e vetme për t’i dhënë vetes mundësinë për t’u drejtuar nga një qeveri që prioritet ka qytetarët.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.