Basha në zonat e prekura nga tërmeti: Të përshpejtohet procesi i evidentimit të dëmeve në banesa
Kreu i opozitës Lulzim Basha thotë se në Ishëm,manzë dhe Sukth trë Durrësit gjendja është e rëndë. Sipas tij, mijëra familje të lëna në mëshirë të fatit dhe në harresë totale, pa ndihma, pa vlerësim objektesh, pa çadra.
Basha kërkoi përshpejtimin e procesit të vlerësimit dhe për të shkurtuar kohën e vlerësimit, qeveria,sipas tij,duhet të therrasë 500 inxhinierët e gatshëm për të ndihmuar. Po ashtu, kreu i PD-së kërkoi që të mos nxitohet me shembjen e objekteve çdo objekt përbën provë materiale për hetime penale. Janë 51 njerëz të futur në dhe’ dhe qindra të tjerë të plagosur dhe mijëra të traumatizuar. Kjo nuk do të shkojë pa përgjegjësi.
KOMUNIKIMI ME GAZETARËT I KRYETARIT TË PARTISË DEMOKRATIKE, LULZIM BASHA, NGA SUKTHI.
Kam katër orë në këtë zonë që është totalisht e harruar. Dua t’ju falënderoj që keni ardhur deri këtu. Nëse keni mundësi dua t’ju ftoj të shkoni deri në Ishëm. Sot kam qenë në Gjuriçaj të Ishmit, pastaj në Kërtushaj, kam qenë në Kameras, kam qenë në Armath, në qendër të Manzës. Kam parë me sytë e mi dëme të jashtëzakonshme në shtëpitë e banorëve. Në zonën e Gjuriçajt 9 në 10 shtëpi janë jashtë funksionit, nuk jetohet. Natyrisht, me aq sa kemi mundur, me aparatin fotografik kam arritur të evidentoj dhe të nxjerr në faqen time të “Facebook”-ut disa prej dëmeve.
Ju ftoj ju duke ju falënderuar për punën e jashtëzakonshme që po bëni, të shkoni dhe të evidentoni. Dëmet janë kudo por në këtë zonë ka një harresë totale. Nuk ka shkuar askush ti shohë dhe t’i japë një sqarim nëse mund të rrinë apo nuk mund të rrinë aty. Në shumicën e rasteve nuk kanë as çadra dhe në ato raste kur u është dhënë një çadër, kanë qenë bashkëfshatarët e tyre që i kanë sjellë nga Italia apo një organizatë nga Kosova që u kishte çuar çadra. Pra, harresë dhe lënie totale në mëshirë të fatit e qindra familjeve, mijëra banorëve. Kjo është gjendje shumë e rëndë. Kjo është gjendje emergjence totale.
E dyta, në kampin e çadrave që është ngritur në Manëz, është një batërdi e vërtetë, balta ka shkuar deri në gju, brenda ka nga foshnje një muajshe dhe fëmijë një apo dy vjeç, deri tek pleq 70-80-90 vjeç të sëmurë.
Ka dy objekte shkollore, të cilat me sa më tha, janë çertifikuar jashtë rrezikut dhe nuk ka asnjë arsye pse familjet të qëndrojnë në llucë. Janë familjet e 5 pallateve që u është vënë kryqi, janë 5 pallate të dëmtuar nga tërmeti dhe janë jashtë, nata e 6-të në shi. Madje, kur ndodheshim aty, filloi prapë shiu që e bën ftohtin edhe më të papërballueshëm. Nuk ka pse të jenë aty. Të merren dhe të çohen në shkolla ose propozimi tjetër që ka ardhur, po kështu nga propozimi i ekspertëve, të vendosen në kontenierë. Por nuk mund të qëndrojnë në çadra. Prej ditës së dytë të emergjencës kam bërë thirrje që askush të mos qëndrojë në çadra. Një numër është sistemuar ose tek të afërmit ose në strehime të tjera. Por ndërkohë ja ku i ke të gjitha familjet e 5 pallateve në llucë, në baltë. Kjo është situata.
Situatë shumë e rëndë. Ankohen për seleksionim, që dikush nuk merr asgjë dhe dikush tjetër ka marrë shumë më shumë sesa ka nevojë. Ankohen ata që mund të kenë më pak nevojë, më pak dëme. Unë nuk jam në gjendje t’i verifikoj, por ankesat janë masive. Dhe këto po jua them, pasi, mesa duket, kam qenë atje para jush.
Ju ftoj edhe ju të shkoni atje. S’ka asnjë organizim, s’ka asnjë prani. Tani më thanë që kanë marrë vesh që ka qenë kryetari i opozitës dhe kanë nisur disa makina. Por kjo nuk është mënyra për të punuar. Nuk duhet të presin të vij unë këtu dhe të duken për shoë.
Jam i revoltuar dhe shumë i shqetësuar për situatën që kam parë në Ishëm, në Manëz dhe, natyrisht, edhe dje kur kam qenë në Bubq dhe në Durrës, në lagjen 7, duket se ka një paralizë totale.
Tani edhe një herë dua të përsëris thirrjen time. Kemi propozuar tre pika për ata që kanë vullnetin të dëgjojnë dhe të zbatojnë.
Pika e parë ka ardhur nga takimi që kam patur para dy netësh me profesionistët më të shquar të kësaj fushe. Janë ata të cilët kanë evidentuar burimet njerëzore deri në 500 inxhinierë, të cilët janë gati, nëse pajisen me autorizime nga shteti, të përshpejtojnë procesin e vlerësimit. Kjo ka rëndësi të jashtëzakonshme. Njerëzit duan ta dinë: Kanë mundësi të kthehen aty apo jo? Është diçka që mund të riparohet apo është diçka që mund të prishet dhe të zëvëndësohet?
Kjo, në fund të fundit, jep një farë qartësie dhe, duke dhënë qartësi, i orienton edhe nga veprimi që duhet të marrin. Dikush mund të shkojë të zhvendoset për disa kohë; dikush mund të planifikojë për ndërtim apo për një riparim. Por pa pasur këtë qartësi askush nuk bën dot asgjë. Prandaj përdorimi i këtyre burimeve njerëzore, ekspertëve që i kemi, i kemi në vendin tonë, faleminderit çdokujt që ka ardhur nga jashtë, por këta janë këtu, janë të gatshëm ta bëjnë këtë pa pagesë, janë inxhinierë, janë profesorë, janë pedagogë, janë ekspertë, të cilët kanë dy ditë e kanë ofruar këtë publikisht. E kanë ofruar tek kryetari i opozitës, sepse kryetari i qeverisë kishte një takim tjetër me bamirës dhe me figura të njohura të ekranit. Ashtu e kishte zgjedhur, nuk është koha tani të merrem me këtë. Por kjo nuk do të thotë që ngaqë i mblodha unë, për inat të kryetarit të opozitës, të mos organizojë këtë punë.
500 inxhinierë, tallet. Le të çojë njerëzit e Shtabit, le të marrë kontakt me Fakultetin e Inxhinierisë së Ndërtimit, me Universitetin Politeknik të Tiranës, me institutet përkatëse, le t’i organizojë këta 500 inxhinierë në terren të përshpejtojë procesin e vlerësimit. Gjëja e parë që më kanë kërkuar sot njerëzit është përshpejtimi i procesit të vlerësimit. Ka filluar dimri, është ftohtë, bie shi dhe në çdo situatë kjo do të ishte e vështirë, shto tani edhe traumën që janë pa shtëpi, në rastin më të mirë me çadër mbi kokë që u kullon ujë.
Angazhimi i këtyre njerëzve, 500 por mund të jenë edhe më shumë, i burimeve njerëzore, do të përshpejtonte procesin e vlerësimit, do të jepte më shumë siguri njerëzve dhe do të jepte edhe një faturë të qartë të dëmit.
Dhe ne nuk mund t’i ikim transparencës; as shteti, as qeveria nuk mund t’i ikë transparencës. Sa është dëmi në tërësi, sa është dëmi në zonat më të goditura, sa është dëmi shtëpi më shtëpi. Dhe pastaj faza tjetër, çfarë do të bëjmë me këtë dëm, si do ta riparojmë këtë dëm?
Propozimi ynë është i qartë.
Ka 150 milionë dollarë që do t’u shkojnë oligarkëve me buxhetin e 2020-ës.
Meqënëse janë në proces të rishikimit të buxhetit, meqënëse jemi në gjendjen e fatkeqësisë natyrore, t’i përdorë me fuqitë që jep ligji, të anullojë kontratat e 10 oligarkëve, t’i çojë këto 150 milionë dollarë tek njerëzit që janë në nevojë. Këtë propozim po e detajojmë edhe më shumë sesi të shkojë sa më shpejt kjo ndihmë në mënyrë sa më të saktë, pa abuzim, tek ata që kanë nevojë.
Sepse duke i çuar këto para tek njerëzit që kanë nevojë, përshpejtojmë procesin e riparimit, ku riparimi është i mundshëm, rindërtimit të shtëpisë, ku kjo është e mundshme.
Të mos harrojmë, pjesa e dukshme që është e tmerrshme, e pallateve të shkatërruara, të dëmtuara rëndë dhe që vazhdon të evidentohet nga media, është shumë e dhimbshme dhe masive. Ju siguroj që është vetëm një pjesë e vogël e dëmit që nuk është evidentuar. Të gjitha këto fshatra rreth e qark kanë pësuar dëme, kush më shumë e kush më pak.
Kujt ia merrte mendja që ajo që është ndjerë në mes të Durrësit ka goditur një zonë si Gjurica e Ishmit, 9 në 10 shtëpi.
A ka shkuar njeri t’i shohë? Jo. Nuk ka shkuar njeri t’i shohë. Dhe kjo është diçka e papranueshme.
Sot është mbushur java e tragjedisë së 26 nëntorit. Është e papranueshme që një javë më vonë atje nuk shkon askush t’i shikojë. Dhe që për ndihma vazhdojnë të mbështeten tek kontributet vullnetare.
Kjo është gjendja. Ju inkurajoj të vazhdoni të raportoni. Inkurajoj qytetarët të vazhdojnë të marrin informacionet nga media dhe jo propaganda. I bëj thirrje qeverisë të jetë në krye të detyrës.
Nuk jemi në garë.
Të mos e konsiderojë garë propozimin e opozitës, t’i marrë këta inxhinierë, t’i çojë në terren, të bëjnë vlerësimin dhe të bëjë urgjentisht alokimin e fondeve për njerëzit në nevojë.
Nuk pret koha.
Këta njerëz nuk presin, janë në nevojë ekstreme.
Duhet të shkosh vetë aty e të shohësh në çfarë nevojë të tmerrshme janë. Për gjithçka, për një batanije. Foshnja 1 muajsh, nata e tretë që flinte në makinë. S’kishte shkuar ta shikonte kush, s’kishin ilaçe. Është situatë masive dhe nuk është një familje që po ndihmojmë, një, pesë, gjashtë familje.
Nuk është çështje bamirësie, kjo ka nevojë për ndihmë strukturore, të mirëkoordinuar, kanë nevojë për veprime konkrete.
Boll më me llafe, boll më me shfaqje.
Ky është mesazhi që kam.
Partia Demokratike, unë dhe opozita do të vazhdojmë të japim ndihmesën maksimale të mundshme me aq sa kemi në dorë dhe do të mbështesim pa asnjë rezervë këdo që është i angazhuar të ndihmojë. T’u shkojmë në ndihmë njerëzve.
Nuk ka kohë dhe nuk ka hapësirë për asnjë lloj manovre llafesh apo keqpërdorim politik të situatës.
T’u shkojmë në ndihmë njerëzve. Propozimi ynë është t’u shkojmë në ndihmë njerëzve.
Thirr inxhinierët, të përshpejtojmë procesin e vlerësimit në terren, të kalojmë fondet nga 10 oligarkët tek mijëra familje në nevojë.
Pyetje: Nga aktekspertimi dhe aktkonstatimi që janë bërë nga inxhinierët ka pasur raste kur banesat janë shembur dhe banorët ankohen se janë shembur bashkë me orenditë shtëpiake, dokumentacion dhe me gjithçka që kanë pasur brenda. Ju si e komentoni këtë fakt?
Lulzim Basha: Unë nuk kam koment në kuptimin politik të fjalës, por dua t’ju them çfarë më thanë inxhinierët dhe ekspertët para dy netësh. Shembja e shpejtë e objekteve është kriminale.
E para e punës duhet studiuar për të parë çfarë ndodhi, pse ndodhi dhe këtë e bën çdo vend që kalon një tragjedi të tillë për të përdorur fjalën e një prej profesorëve të nderuar aty që dukej që kishte respektin e të gjithë kolegëve – betoni flet. Mënyra se si është shkatërruar një ndërtesë tregon gjithçka që nga zbatimi i projektit deri tek kodet e ndërtimit, përmirësimet që duhen bërë.
Për të mësuar që në të ardhmen, larg qoftë, të mos na përsëriten gjëra të tilla, gjëja e parë që duhet bërë, është se duhet studiuar çdo objekt përpara se të shembet. Çdo objekt përbën sot e tutje provë materiale për hetime penale.
Ka përgjegjësi kjo punë. Janë 51 njerëz të futur në dhe’ dhe qindra të tjerë të plagosur dhe mijëra të traumatizuar.
Kjo nuk do të shkojë pa përgjegjësi. Përbën provë materiale.E treta, mund të bëhet një përpjekje minimale pa rrezikuar njerëzit, për të nxjerrë orenditë.
Pyetje: Tre prokuroritë e qarqeve kryesore kanë nisur hetim por akoma nuk kanë një person ose kompani konkrete kujt i referohen këto hetime ndërkohë që ata kanë kërkuar që të mos prishen banesat, të paktën Prokuroria e Tiranës, në një reagim zyrtar pa qenë prokurori prezent.
Lulzim Basha: I gjithë fokusi im, i Partisë Demokratike dhe i opozitës në terren është të ndihmojmë njerëzit.
Prokuroria të bëjë detyrën, prokuroria ka ligjin, ka pushtetet e veta. Nëse prokuroria bën detyrën, nuk ka asnjë njeri, nga i pari i vendit tek i dyti i vendit, i treti i vendit ta marrë prokurorinë zvarrë, sepse në një shtet të së drejtës, të merr prokuroria zvarrë.
Nëse prokuroria merret zvarrë dhe merret vegël, është problem më vete, por sot i gjithë fokusi im dhe i opozitës është t’jugjendemi njerëzve pranë, t’i ndihmojmë me çfarë të mundemi dhe të mbështesim çdokënd që u gjendet dhe që i ndihmon.
Thirrja ime është që një orë e më parë të përshpejtohet procesi i vlerësimit.
Fshatra të tëra, zona të tëra, lagje të tëra në qendër të Durrësit, lagjia 7 është në qendër të Durrësit nuk kanë parë vlerëzues me sy, sepse ka më pak vlerësues se ç’duhet të kemi.
T’i marrin këta inxhinierë që ofrojmë kontributin e tyre vullnetar, t’i angazhojnë, të përfundojë sa më shpejt vlerësimi, të bëjnë gati fondet sepse nuk është çështje vetëm bamirësie, mirënjohje për këdo që ndihmon, për bamirësit, kontributorët dhe do të kemi nevojë për javët dhe muajt që vijnë për ndihmën e tyre, por tani shteti duhet të marrë përgjegjësi, ndaj duhet të kemi veprime të mirëkoordinuara, sistematike dhe me përgjegjësi shtetërore për t’i ardhur në ndihmë banorëve.
Ky është plani ynë me tre pika dhe ia kemi vënë në dispozicion kujtdo që ka vullnetin për ta zbatuar.
Faleminderit.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.