Basha shuan spekulimet: Partia Demokratike merr pjesë në zgjedhje
Kryetari i Partisë Demokratike Lulzim Basha konfirmon pjesëmarrjen e PD-së në zgjedhjet parlamentare të 18 qershorit.
Kryetari i Partisë Demokratike Lulzim Basha konfirmon pjesëmarrjen e PD-së në zgjedhjet parlamentare të 18 qershorit. Gjatë mbledhjes së zhvilluar me drejtuesit e degëve të Partisë Demokratike për situatën politike dhe sfidat e opozitës, Basha hodhi poshtë zërat për një bojkot të mundshëm të PD-së në zgjedhje, madje u shpreh optimist për fitore të së djathtës.
“Partia Demokratike merr pjesë në zgjedhje dhe zgjedhjet do të jenë të lira e të ndershme. Nuk ka asnjë skenar tjetër. Ne do të luftojmë për zgjedhje të lira e të ndershme, ne do të përballemi për zgjedhje të lira e të ndershme”, u shpreh Basha.
Qëndrimi i Bashës vjen rreth një javë pas mbledhjes me aleatët e djathtë, ku foli për një marrëdhënie të kushtëzuar me Kuvendin. Në këtë mbledhje, kreu i PD-së foli edhe për kërkesat e opozitës për reformën zgjedhore.
“Me votimin elektronik, me numërimin elektronik shqiptarët do të kenë zgjedhje të lira dhe të ndershme. Vota e tyre nuk do të tjetërsohet”, tha kreu i PD-së.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.