Basha takim me drejtuesit e lartë të Këshillit Ekonomik gjerman: Grupe të përbashkëta për programin dhe investimet
Kryetari i opozitës, Lulzim Basha është takuar me Presidenten e Këshillit Ekonomik gjerman Astrid Hamker si dhe me zëvendës presidentin Friedrich Merz, njëkohësisht CEO i BlacRock Inc, Fondit më të madh të investimeve në botë.
Referuar njoftimit zyrtar, Basha është shprehur optimist për mundësinë e e zgjerimit të bashkëpunimit të dy vendeve. “Gjeta mbështetje të plotë për të na asistuar me ekspertë dhe eksperiencën e tyre gjatë detajimit të programit tonë ekonomik dhe nesër në qeverisje për të nxitur investitorët gjermanë të shqyrtojnë Shqipërinë si destinacion të investimeve të tyre,” shkruan ai.
Basha njofton se ka gjetur mbështetje të plotë që forca e tij politike të asistohet me ekspertë dhe me eksperiencën e tyre gjatë detajimit të programit ekonomik. Një vëmendje e veçantë, sipas Bashës, është edhe nxitja e investitorëve gjermanë që të shqyrtojnë Shqipërinë si destinacion të investimeve të tyre.
“Ne do të ngremë grupe të përbashkëta pune me qëllim bërjen realitet të objektivit tonë për ta bërë Shqipërinë një vend tërheqës për investimet gjermane në veçanti dhe të huaja në përgjithësi, për të rritur punësimin me paga dinjitoze dhe zhvillimin ekonomik të vendit” njofton Basha.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.