Basha, takime me krerët e Prishtinës dhe Mitrovicës: “Bashkërendim të politikave, në mbështetje të institucioneve të Kosovës”
Kryedemokrati, Lulzim Basha, ka vijuar axhendën e takimeve me krerët e politikës në Kosovë. Në ditën e dytë të vizitës kryedemokrati është takuar me kryetarin e Komunës së Prishtinës, Shpend Ahmeti. Basha i premtoi Ahmetit mbështetje të pakushtëzuar për institucionet e Kosovës, veçanërisht në procesin e dialogut për pavarësinë me Serbinë. Nga ana tjetër Ahmeti ka vlerësuar mbështetjen e Shqipërisë duke thënë se ndihma e Shqipërisë në këtë kohë është më e domosdoshme se kurrë.
Mbështetje e pakushtëzuar për institucionet e Kosovës që kanë treguar se dinë të përballen me maturi e mençuri me sfida. Republika e Shqipërisë dhe forcat politike në Shqipëri mund edhe të marrin mësim nga Kosova. Shërbimi më i mirë është heqja dorë nga protagonizmi i pavend dhe vënia në dispozicion të Kosovës e gjithë kapacitetit administrativ në Shqipëri.- u shpreh z.Basha.
Në këtë periudhë nevojitet kohezion i mirë i faktorit politik brenda Kosovës por edhe koordinim i faktorit shqiptarë në përgjithësi. Kjo është periudhë e vështirë për Kosovën jo vetëm në aspektin politik të jashtëm sa i përket Gjykatës por edhe sa i përket dialogut. Ndihma e Shqipërisë është më e domosdoshme se kurrë tash” – u shpreh më tej z.Ahmeti.
Kryetari i PD-së, Lulzim Basha vijoi takimin e tij edhe me kreun e komunës së Mitrovicës, Agim Bahtiri. Duke u shprehur optimist për ruajtjen e integritein territorial Basha tha se ka një plan konkret për raportet me Kosovën dhe se do të bashkëpunohet në fushën e energjisë dhe atë diplomatike, bashkëpunimi është vlerësuar edhe nga kreu e komunës së Mitrovicës.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.