Basha: “Të ndalojmë” këtë buxhet, qeveria asnjë politikë kundër varfërisë. Të bëhet transparencë për çdo koncesion
Qeveria edhe në buxhetin e vitit 2018 nuk ka asnjë politikë kundër varfërisë, për zhvillimin ekonomik dhe asgjë për shqiptarët e ndershëm.
Kështu është shprehur kreu i Partisë Demokratike Lulzim Basha gjatë fjalës së tij në Kuvend, ku theksoi se tre propozimet kryesore që ka buxheti sipas tij janë në shërbim të krimit.
“I pari është detyrimi ndaj biznesit të vogël për të lëshuar faturë për çdo produkt. Është një politikë që do të dëmtojë mirëqenien e njerëzve. Është kundërshtuar nga FMN, Banka Botërore dhe ekspertët.
Tani gjeti dredhinë e duhur duke futur në TVSH gati 100 mijë biznese, kryeministri do të justifikohet që shteti nuk ka mundësi të mbikëqyrë kaq shumë biznese, prandaj mbikëqyrja e TVSH-së duhet të jepet me koncesion për pasurimin e tij, Edi Rama po dënon me qindra e mijëra familje shqiptare”, u shpreh kryeopozitari.
Një tjetër pikë, ku Basha u ndal ishte edhe heqja e tatimit mbi fitimin dhe ulja e TVSH me 6 për qind në sektorin e turizmit.
“Heqja e tatimit mbi fitimin dhe ulja e TVSH me 6 për qind për hotelet luksoze, se kush do të jetë në këto hotele do e përcaktojë me vendim kryeministri dhe kjo sjell vetëm kosto, e ka kundërshtuar edhe FMN. Heqja e taksave për hotelet e luksit i hap rrugë evazionit fiskal dhe parave të pista me ndërtimin dhe administrimin e hoteleve. Nuk do ketë asnjë mbikëqyrje për paratë e pista”.
Basha foli edhe për projektin “1 Miliard” ku theksoi se kjo është masa më shkatërruese për vendin.
“Masa e tretë dhe masa më shkatërruese është programi “ 1 Miliard” për PPP. Ky program ka dy qëllime, pastrimin e parave të drogës, krimit dhe korrupsionit, si dhe privatizimin dhe përqendrimin e ekonomisë në duart e oligarkëve dhe klientëve. Ta ndalojmë këtë buxhet që thellon varfërinë, ta ndalojmë krimin ekonomik dhe financiar, si dhe të bëjmë transparencë për çdo koncesioni, t’i ndërpresim rrugën krimit ekonomik”, theksoi Basha në Parlament.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.