Bashkëpunim Tiranë-Athinë, Veliaj: Projekte konkrete për përmirësimin e shërbimeve
Athina dhe Tirana do të nënshkruajnë së shpejti një protokoll bashkëpunimi, që do ti hapë dritën jeshile projekteve konkrete mes dy kryeqyteteve, të cilat në thelb do të kenë përmirësimin e shërbimeve ndaj qytetarëve.
Kryetari i Bashkisë së Tiranës, Erion Veliaj zhvilloi një vizitë dy ditore në Athinë, ku u prit në një vizitë zyrtare nga homologu i tij grek, Yiorgos Kaminis.
Dy kryebashkiakët ranë dakord të çojnë në një nivel tjetër marrëdhëniet mes dy qyteteve, me qëllim shkëmbimin e eksperiencave dhe implementimin e projekteve të përbashkëta.
“E mezi pres propozimin e kryetarit Kaminis për të pasur një kalendar të përbashkët kulturor. Marrëdhëniet midis shteteve dhe diplomatëve janë shumë të rëndësishme, marrëdhëniet midis njerëzve janë akoma edhe më të rëndësishme. Ndaj, mezi pres që në vizitën e kthimit në Tiranë të kemi dakortësuar një kalendar kulturor shkëmbimesh, edhe një mënyrë se si të mësojmë akoma më shumë nga njëri-tjetri”, deklaroi Erion Veliaj, Kryetar i Bashkisë Tiranë
“Aspirojmë që bashkëpunimi, të cilin e filluam sot, të specifikohet muajt e ardhshëm në fusha konkrete. Do të vijojë një vizitë e imja në Tiranë, së shpejti, dhe dua të falënderoj kryebashkiakun Veliaj për ftesën. Vizita do të përfundojë me nënshkrimin e një protokolli bashkëpunimi mes dy qyteteve”, u shpreh Yiorgos Kaminis, Kryetar i Bashkisë së Athinës
Gjatë vizitës së tij në Athinë, kryetari i Bashkisë së Tiranës, Erion Veliaj zhvilloi edhe një takim me shtetas shqiptarë që jetojnë dhe punojnë në Greqi.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.