Bashkëpunimi mes dy Policive Kufitare – Hajnaj: Pikat e përbashkëta të kalimit kufitar do të fillojnë me Kakavijën

Drejtoresha e Departamentit për Kufirin dhe Migracionin, Aida Hajnaj ka zhvilluar sot një takim me homologen e saj Drejtoreshën e Përgjithshme të Departamentit të Kufirit dhe Migracionit në Policinë Greke, Zaharoula Tsirigoti në Doganën e Kapshticës.

Bashkëpunimi midis dy Drejtorive të Kufirit, patrullimet e sinkronizuara të shërbimeve policore me qëllim parandalimin, zbulimin dhe goditjen e veprimtarisë kriminale ndërkufitare kanë qenë edhe çështjet kryesore të diskutuara gjatë takimit.

Drejtoresha e Kufirit dhe Migracionit, Aida Hajnaj, vuri theksin te bashkëpunimi midis dy Drejtorive të Kufirit, që sipas saj synon shkëmbimin e informacionit, parandalimin dhe goditjen e krimit ndërkufitar.

Po ashtu, në fokus të diskutimit ishte edhe ngritja e pikave të kalimit kufitar, që sipas Hajnaj do të nisë me Kakavijën dhe më pas do të zbatohet edhe në pikat e tjera në kufirin me Greqinë.

“Gjithashtu në takimin e sotëm u diskutua dhe në parim ngritja e pikave të përbashkëta të kalimit kufitar, e cila do të fillojë me Kakavijën dhe pastaj do të zbatohet në të gjitha pikat e tjera që janë në kufirin me Greqinë.”

Ndërkohë, nga ana tjetër Tsirigoti u shpreh se shkëmbimi i informacioneve që bëhet ndërmjet dy shërbimeve policore, ka sjellë rezultate pozitive si në arrestimin e personave, ashtu edhe në sekuestrimin e lëndëve narkotike.

“Objektivi ynë i ardhshëm është plotësimi i kuadrit ligjor për qendrën e përbashkët të kontaktit policor dhe bashkëpunimit doganor në Kakavije dhe vazhdimin e masave që tani jemi duke zbatuar, patrullime të përbashkëta dhe takimet e përbashkëta që po zhvillohen në luftë kundër kriminalitetit.”

Në mbyllje të takimit janë inspektuar edhe dy pikat e kalimit kufitar Shqiptar dhe atij Grek.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.