Bashkia Durrës tender 83.3 mln lekë për rikualifikimin e qendrës së qytetit – Ja çfarë parashikon projekti
Bashkia e Durrësit ka hapur procedurat e prokurimit për rikualifikimin e Rrugës A.Goga nga Sheshi Iliria deri te Muzeu i Dëshmorëve. Objekti është i pozicionuar në qendër të qytetit bregdetar.
Bëhet fjalë për një fond limit me vlerë rreth 83.3 milionë lekë, i cili do të akordohet nga Buxheti i Bashkisë. Projekti parashikon ndërtimin e dy shesheve të vogla, me stola dhe gjelbërim në anë të Pallatit të Kulturës dhe përgjatë Gjykatës.
Në projekt është planifikuar gjithashtu edhe zgjerimi i trotuareve ekzistuese në mënyrë që të krijohen vendkalime për këmbësorët. Ndërkohë, është projektuar që tek kryqëzimi ku lidhet rruga A.Goga me Sheshin Iliria të ndërtohet edhe një rreth rrotullim.
Nëpërmjet këtij investimi synohet jo vetëm rikualifikimi dhe ndërtimin e një segmenti të ri, por edhe vënia në pah e pasurive arkeologjike të zonës, duke përmirësuar kështu kalimin dhe qëndrimin e turistëve.
Procedura do të qëndrojë e hapur deri në datën 11 Janar, pra operatorët do të kenë mundësi të dorëzojnë ofertat e tyre deri në këtë datë. Ndërkohë, kohëzgjatja e kontratës parashikon një periudhë kohore 90 ditë që prej nënshkrimit të saj.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.