Bashkia Kamëz paralajmëron rrezikun e rikthimit të përmbytjeve: Fondet e mjetet e premtuara nga qeveria nuk janë sjellë ende
Ndërsa po afrohet stina e reshjeve, Bashkia e Kamzës paralajmëron rrezikun që të përsëriten përmbytjet e ndodhura edhe vitin e kaluat e në vitet e mëparshme. Referuar njoftimit të kësaj bashkie, edhe pse prej vitesh ka përmbytje në Kamëz, mungesa e investimeve në kolektorë sjell përmbytje të shumë familjeve.
“Ndonëse Bashkia Kamëz bën më të mirën e saj në pastrimin e kolektorëve, madje edhe me mjete të marra me qira, pasi qeveria as dhe një ekskavator dhe zjarrfikëse nuk ka sjellë ende, sërish përmbytjet nuk janë shmangur” njofton Bashkia.
Duke iu referuar bisedimeve të zhvilluara mes kryebashkiakut Xhelal Mziu e kryeministrit Edi Rama vitin e kaluar kur u shënuan përmbytje në Kamëz e ku u premtuan një serë masash si dëmshpërblim për të përmbyturit, financim për pastrimin e kolektorëve apo pajisja me eskavator, Bashkia thotë se ato nuk janë realizuar akoma.
“Rama nuk ka akorduar asnjë fond për atë çfarë i kërkoi kryetari i Bashkisë Kamëz, sikurse në sirtarët e ministrive flenë afro 150 projekte të shoqëruara më shkresë përcjellës që mbajnë firmën e kryebashkiakut Xhelal Mziu. Që në Kamëz të mos kishte përmbytje duhej që investimi në 3 kolektorët të ishte mbyllur, por për ironi Rama dhe qeveria e tij jo vetëm nuk kanë sjellë fondet për investime, por nuk ka sjellë as një ekskavator. Bashkia, sikurse vitin e kaluar, kujdeset për pastrimin e kolektorëve, me qëllim që të mos ketë përmbytje, por edhe nëse ndodh, të ketë sa më pak përmbytje!”- thotë kryebashkiaku Xhelal Mziu, referuar njoftimit zyrtar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.