Bashkia Kamëz: Të rikthehet urgjent Zyra e Punës! Jemi rast unikal në Shqipëri

Bashkia Kamëz deklaron se është rast unikal fakti që në këtë njësi vendore nuk ka një zyrë pune. Në një deklaratë të shpërndarë për mediat, Bashkia deklaron se kalimi i zyrës së punës së kësaj njësie në territorin e bashkisë së Tiranës ka sjellë kosto kohore e financiare për qytetarët. Nga ana tjetër, sipas kryebashkiakut të kësaj njësie vendore, kjo zyrë është e nevojshme sepse u duhet banorëve të Kamzës për të kryer procedurat e nevojshme administrative.

“Jemi rast unikal në Shqipëri, në të 61 bashkitë, që Kamza nuk ka Zyrë Pune. Qeveria e ka hequr Zyrën e Punës nga njësia jonë administrative për ta çuar në territorin e Bashkisë Tiranë. Ky është një absurditet, e pafalshme. Si mund të lësh bashkinë e 6-të më të madhe në vend për nga numri i popullsisë pa Zyrën e Punës!? Banorëve të Kamzës u duhet të shkojnë në Tiranë duke harxhuar kohë dhe para, duke ndenjur në radhë për një vërtetim papunësie apo kërkesë për t’u punësuar!”, – thotë kryetari i Bashkisë Kamëz, Xhelal Mziu duke kërkuar rikthimin urgjent të kësaj zyre në njësinë vendore që drejton.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.