Bashkimi Evropian dhe Gjermania financojnë projektin e ri për të lidhur shkollat në Ballkanin Perëndimor
Eventi i fillimit të projektit “Skema e Shkëmbimit të Shkollave të Ballkanit Perëndimor” u zhvillua të shtunën, në Shtëpinë e Evropës në Tiranë, në kuadrin e “Javët e Evropës 2021”. Projekti do të lidhë shkollat e Ballkanit Perëndimor dhe do të lehtësojë shkëmbimin e të rinjve. Ai do të kontribuojë në rritjen e aftësive dhe njohurive të të rinjve në Ballkanin Perëndimor duke përmirësuar sistemet e arsimit dhe duke promovuar bashkëpunimin në rajon. Ai gjithashtu do të forcojë kapacitetet e RYCO dhe të krijojë një skemë rajonale të shkëmbimit të shkollave.
Projekti bashkëfinancohet nga Bashkimi Evropian (4.5 milion €) dhe Qeveria Federale Gjermane (1 milion €) dhe do të zbatohet nga Zyra Rajonale e Bashkëpunimit Rinor (RYCO) dhe Deutsche Gesellschaft für Internationale Zusammenarbeit (GIZ) GmbH në tre vitet e ardhshme.
Ambasadori i BE në Shqipëri Z. Luigi Soreca dhe Ambasadori Gjerman në Shqipëri Z. Peter Zingraf i mirëpritën të pranishmit, duke theksuar se shkëmbimet e të rinjve kanë një rol jetësor në proceset e pajtimit rajonal.
Ambasadori Soreca theksoi se “BE do të vazhdojë të kërkojë çdo mundësi për të dëgjuar të rinjtë dhe për t’i mbështetur ata në rajon, me një fokus të veçantë në bashkëpunimin, arsimin dhe punësimin.”
Ambasadori Zingraf nënvizoi se: “Për Gjermaninë, RYCO është një rezultat i rëndësishëm dhe shumë i prekshëm i afrimit të rajonit më afër, veçanërisht në kuadrin e Procesit të Berlinit. Nga historia jonë dhe procesi i pajtimit me fqinjët tanë francezë, ne e dimë se sa e rëndësishme është që të rinjtë me prejardhje të ndryshme të takohen, të shkëmbejnë dhe të ndërtojnë së bashku të ardhmen e tyre. “
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.