Bashkimi i ujësjellësve në 3-4 kompani – ERRU: Do të sillte probleme socio-ekonomike për shkak të faturës së unifikuar
Enti Rregullator i Ujit propozon agregimin gradual të shoqërive të ujësjellës-kanalizimeve, si alternativën më të mirë për përmirësimin e situatës së sektorit. Përmes një analize të realizuar nga ERRU, propozohet përzgjedhja e 2-3 ujësjellësve pilot, që do të mund të bashkohen në baza vullnetare dhe me incentiva nga pushteti qendror, sikurse e kërkon edhe legjislacioni në fuqi. Ndërkohë që, çdo agregim pilot do të shërbejnë si shembull ose referencë suksesi për planifikimin dhe zbatimin e strategjisë në vite për të gjithë sektorin.
Enti Rregullator i Ujit ka analizuar dhe mundësinë e agregimit të menjëhershëm të të gjithë shoqëive që operojnë aktualisht, në 3-4 shoqëri të mëdha, duke theksuar se kjo do të sillte një sërë problematikash. Një prej tyre lidhet me sistemin e tarifimit, duke qenë se aktualisht çdo shoqëri UK aplikon tarifat e veta specifike për çdo kategori konsumatorësh në zonën e saj të shërbimit. Aktualisht në vendin tonë janë në fuqi rreth 57 sisteme tarifash shërbimi UK që duhet të unifikohen.
Ndërkohë që, vlera mesatare e faturës mujore në të 57 shoqëritë luhatet nga 350 deri në 2000 lekë/muaj. Për mbulimin e kostove të operimit dhe mirëmbajtjes aktuale në sektor duhet të aplikohet një faturë e unifikuar për sektorin në vlerën prej rreth 1400 lekë/muaj. Sipas ERRU-së, vlera relativisht e lartë e faturës se unifikuar do të krijonte probleme sociale për bashkitë në të cilat aktualisht aplikohen tarifa mjaft të ulta, sidomos për zonën verilindore, ku procesit duhet t’i paraprihet me një politikë subvencionimi të tarifave Sektori i ujit paraqet një sërë problematikash, ndërkohë që në raport me vitin 2019, gjendja në vitin 2020 u përkeqësua në drejtim të ujit pa të ardhura, normës së arkëtimit, mbulimit të furnizimit me ujë dhe mbulimit të kostove direkte të operimit dhe mirëmbajtjes.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.