Bashkitë, bilanc pozitiv pavarësisht Pandemisë – Financat vendore u goditën rëndë në 2020 nga Karantina, por rikuperuan me shpejtësi

Financat vendore janë goditur rëndë gjatë fazave të nxehta të Pandemisë, por kanë reaguar me shpejtësi me lehtësimin e lëvizjes dhe hapjen e ekonomisë duke arritur në fund të vitit 2020 rritje të volumit të të ardhurave krahasuar me vitet e mëparshme. Në raportin për të ardhurat e shpenzimet vendore për vitin 2020, Ministria e Financave konkludohet se Pushteti vendor ka rritur rolin e tij në vite përmes kontributit në ekonomi e në Produktin e Brendshëm Bruto. Raporti i të ardhurave vendore ndaj PBB-së ka ruajtur një trend të vazhdueshëm rritjeje nga 2.38% në vitin 2015, 3.35% në vitin 2019 dhe duke arritur në 3.38% në vitin 2020.

Në 6 mujorin e parë të vitit 2020, pushteti vendor ka realizuar një nivel mjaft të ulët të të ardhurave, ndërkohë që shpenzimet vendore kanë ruajtur gjithashtu një trend të kufizuar si pasojë e tkurrjes ekonomike në tërësi. Për sa më sipër, pushteti vendor ka mbledhur rreth 7 miliard lekë ose vetëm 32% të totalit të të ardhurave vjetore prej 21.9 miliard lekë. I njëjti trend realizimi gjatë periudhës së mbylljes ekonomike të 6 mujorit të parë është ruajtuar edhe në shpenzimet e pushtetit vendor, duke u realizuar vetëm 17 miliard lekë ose vetëm 32% e totalit të shpenzimeve të pushtetit vendor prej 51.6 miliard lekë.

Tejkalimi i situatës pandemike dhe hapja e ekonomisë bëri që trendi i treguesve të pushtetit vendor të ndryshojë duke nisur një rikuperim me ritëm të lartë. Gjatë pjesës së dytë të vitit u realizuan rreth 14.9 miliard lekë të ardhura nga pushteti vendor dhe gjithashtu 34.7 miliard lekë shpenzime nga të gjitha burimet vendore. Rritja e besimit në rikthimin e ekonomisë në normalitet bëri që të dyfishohen shpenzimet mujore të pushtetit vendor në tërësi. Gjithashtu, pasojë e akumulimit të shumë shpenzimeve gjatë 6 mujorit të parë 2020, u reflektua në realizimin e vlerës më të madhe të shpenzimeve më rreth 7 miliard lekë në muajin korrik. Ndërkohë që vlerën më të lartë të të ardhurave mujore pushteti vendor e ka realizuar në muajn Qershor me rreth 3.2 miliard lekë.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.