Bashkitë, kredi nëpër banka – Stoku i borxhit të qeverisjes vendore në fund të vitit 2020 rreth 4.2 milionë dollarë
Ndërsa kanë një nivel mjaft të lartë detyrimesh të prapambetura, shumë Bashki i janë drejtuar sistemit bankar vendas për të mbuluar nevojat financiare.
Në total, stoku i borxhit të qeverisjes vendore në fund të vitit 2020 rezulton të jetë rreth 432 milionë lekë ose rreth 4.3 milionë dollarë, afërisht 0.026% ndaj PBB-së. Krahasuar me të dhënat e vitit 2020, rezulton se bashkitë kanë ulur ekspozimin e tyre ndaj bankave me rreth 150 milionë lekë, në varësi të planeve përkatëse për shlyerjen e huave. Ndonëse ekspozimi i bashkive në huamarrje është i ulët dhe luan një rol modest në borxhin e përgjithshëm të Shqipërisë, asnjë nga bashkitë në vend që prej vitit 2014 nuk ka marrë hua. Kjo, jo vetëm për kushtet që duhen plotësuar por edhe në vijimësi të trajektores së konsolidimit fiskal të ndërmarrë nga MFE. Kjo e fundit duket të ketë kufizuar hapësirën për huamarrje të re për bashkitë, për sa kohë borxhi vendor rrit nivelin e përgjithshëm të borxhit publik.
Bazuar në të dhënat e publikuara në regjistrin e borxhit, në fund të vitit 2020, rezulton se bashkitë Korçë, Pogradec, Vlorë, Elbasan, Lezhë kanë hua aktive në sistemin bankar vendas. Të gjitha huatë e lartpërmendura janë kontraktuar në vitet 2010 (bashkitë Korçë, Pogradec, Vlorë dhe Elbasan) dhe vitin 2014 (bashkitë Korçë dhe Lezhë), me qëllim financimin e projekteve infrastrukturore. Pas vitit 2014, asnjë bashki nuk rezulton të ketë marrë hua, ndonëse nevojat për investime janë të mëdha dhe buxhetet kapitale të bashkive të pamjaftueshme.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.