“Bashkitë të kenë politikat e tyre zhvillimore” – Civici: 90% e burimeve fokusohen te infrastruktura dhe kohezioni social, duhet ndryshim
Bashkitë dhe komunat duhet të kenë politikat e tyre specifike në drejtim të zhvillimit ekonomik, pa u varur nga politikat qendrore. Ky ishte rekomandimi i kryetarit të Këshillit Ekonomik në Bashkinë e Tiranës, Adrian Civici gjatë Forumit Ekonomik Rajonal, ku merrnin pjesë përfaqësues nga të gjitha bashkitë dhe komunat shqipfolëse.
Prof. Civici iu referua një studimi të kryer prej tij së fundmi, i cili konstaton se ka 3 akse kryesore në çdo zhvillim të bashkisë e që janë: Infrastruktura, kohezioni social dhe politikat ekonomike dhe zhvillimore. Por, sipas tij, ndryshe nga bashkitë në vendet perëndimore, që fokusojnë burimet e tyre financiare dhe njerëzore te politikat ekonomike, në vendin tonë 90% e tyre janë të fokusuar në 2 shtyllat e para, çka sipas tij duhet të ndryshojë.
Të pranishmit në konferencë theksuan rëndësinë e bashkëpunimit ndërkufitar në projekte të përbashkëta, edhe në drejtim të përthithjes së fondeve nga Bashkimi Evropian.
Edhe të pranishmit e tjerë në këtë forum të rëndësishëm ekonomik rajonal dhanë rekomandimet e tyre mbi hapat që duhet të ndjekë Union ii Bashkive Shqiptare në Rajon dhe pushteti vendor në rimëkëmbjen e ekonomisë locale dhe në sektorin e turizmit rajonal.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.