Bashkitë u “kursyen” për qytetarët – Ulën investimet, “lëshuan dorën” për pagat e administratës
Bashkitë kanë shpenzuar nga fondet e veta gjatë vitit 2018, 48.3 miliardë lekë, me një rritje të lehtë me 0.9 %, krahasuar me vitin e mëparshëm. Norma e rritjes së shpenzimeve, ngjashëm me atë të të ardhurave nga burimet e veta vendore, rezulton të jetë moderuar ndjeshëm, pas përshpejtimit të shënuar në vitin 2016. Referuar raportit të financave vendore, shpenzimet korrente shënuan një nivel prej rreth 35.2 miliardë lekë, në fund të vitit 2018, në rritje me rreth 17.2 për qind në terma vjetorë, ku bëhet fjalë konkretisht për shpenzime për personelin dhe shpenzime të tjera operative.
Ndërsa në të kundërt, ecuria e shpenzimeve kapitale me fondet e veta kontribuoi negativisht në ecurinë e shpenzimeve totale. Shpenzimet kapitale ose investimet, përbëjnë një zë të rëndësishëm të buxheteve vendore dhe një parakusht për zhvillim ekonomik afatgjatë. Ndër vite, niveli i shpenzimeve kapitale ka qenë i luhatshëm, edhe pse paraqet një korrelacion të mirë me ecurinë e burimeve financiare të veta të bashkisë, veçanërisht të ardhurat nga taksa e ndikimit në infrastrukturë nga ndërtimet e reja.
Pas rritjes së përshpejtuar në vititn 2017, shpenzimet për investime shënuan një vlerë të përgjithshme prej 13.1 mld lekë, në fund të vitit 2018, në rënie me rreth 26.7 për qind në terma vjetore. Shifër kjo që tregon edhe “kursimin” për shërbimet e ofruara ndaj qytetarëve.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.