BB analizon remitancat – Shqipëria e 49-ta në botë, por e 127-ta për dërgesa

Shqipëria është vendi i 10-të në Europë sa i përket peshës që zënë remitancat në ekonomi.

Remitancat janë sa 9.6% e PBB në vendin tonë, thonë projeksionet më të fundit të Bankës Botërore për flukset e remitancave dhe migracionit në nivel global. Edhe sa i përket kostos së transferimit të parave nëpërmjet shërbimeve që e ofrojnë diçka të tillë, Shqipëria rezulton në listën e 5 më të shtrenjtave, të paktën për një itinerar; atë të dërgimit të parave nga Zvicra.

Me rreth 1.45 miliardë dollarë remitanca në 2018-ën, dhe me një peshë në 9.6% në Prodhimin e Brendshëm Bruto, Shqipëria renditet e 49-ta në botë në indikatorin e fundit. Sa i përket dërgesave ndërkohë, renditja përkeqësohet ndjeshëm, me Shqipërinë që zë vendin e 127-të në botë. Dërgesat fiksohen në 0.8% të Prodhimit të Brendshëm Bruto, ose vetëm 106 milionë dollarë në 2017-ës.

Gjatë viteve të fundit vihet re një rënie e ndjeshme e flukseve dalëse të parave nga shqiptarët. Që prej vitit 2008, kur fiksoheshin në 280 milionë dollarë, rënia është thuajse progresive, dhe në harkun e 10 viteve fiksohet në 164%.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.