BB: Bankat shqiptare, të shëndetshme – Të dytët në rajon pas Serbisë në dy indikatorët kryesorë të shëndetit bankar

Në raportin më të fundit periodik për vendet e Ballkanit Perëndimor, ku vlerësohet edhe impakti i covid-19 për të 6 ekonomitë e rajonit, mes të cilave edhe Shqipëria, Banka Botërore analizon gjerësisht edhe sektorin bankar. Për Shqipërinë, por edhe të gjithë rajonin në tërësi, ky sektor vlerësohet i mirëkapitalizuar dhe mjaftueshëm likuid. Madje, Banka Botërore vlerëson se dy prej indikatorëve më të rëndësishëm të sektorit, e rendisin Shqipërinë të dytën në rajon.

Indikatori i pare, ai mjaftueshmërisë së kapitalit e rendit kështu Shqipërinë në vendin e dytë në rajon, vetëm pas Serbisë, që ka një treg financiar më të zhvilluar së vendi ynë, pasi është më i hershëm si dhe bazohet mbi një ekonomi ndjeshëm më të zhvilluar, si në volum ashtu edhe në kohë. Ky indikator, për bankat që operojnë në vendin tonë fiksohet në 18.3%. Indikatori tjetër më i rëndësishëm për shëndetin e institucioneve huadhënëse është ai i aseteve likuide në raport me totalin e asteteve.

Në Shqipëri ky indikator fiksohet në 35.7%. Kjo shifër na vendos sërish të dytët në rajon, por me një diferencë të papërfillshme me Serbinë e vendit të parë, ku norma fiksohet në vetëm 0.3 pikë përqindje më shumë, në 36%. Të dy këta sinjalizojnë një shëndet të mirë të bankave që operojnë në Shqipëri, ç`ka përkthehet në siguri për qytetarët, por edhe bizneset dhe ekonominë në kohë krizë, si kjo që po kalon Shqipëria dhe e gjithë bota aktualisht. Të dhënat e Bankës Botërore për sektorin reflektojnë statistikat e mbledhura deri në Prill të këtij viti, mbi të dhënat e Dhjetorit të 2019-ës.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.