BB flet për të ardhmen e ekonomisë – “Falë” tërmetit, vitin e ardhshëm Shqipëria drejt rimëkëmbjes

Në raportin më të fundit periodik për vendet e Ballkanit Perëndimor, Banka Botërore analizon gjerësisht ecurinë e ekonomisë shqiptare si dhe pritshmëritë për të ardhmen. “Duke supozuar se pandemia do të vihet nën kontroll deri në fund të vitit, PBB-ja në vitin 2021 parashikohet të rikthehet në rritje me 5 përqind, për shkak të rimëkëmbjes së eksporteve, konsumit dhe investimeve. Gjithashtu, vijimi i procesit të rindërtimit të strukturave të dëmtuara nga tërmeti pritet t’i japë hov rritjes ekonomike, siç ka ndodhur në situata të ngjashme në ekonomitë e tjera në zhvillim. Pas kësaj periudhe, rritja do të varet gjithnjë e më shumë nga konsumi privat, mbështetur nga rindërtimi pas tërmetit.

Investimet private dhe ato publike do të kontribuojnë gjithashtu pozitivisht në rritjen ekonomike për sa kohë që qeveria do të vijojë reformat për përmirësimin e klimës së biznesit dhe investimet në infrastrukturë. Sektori i shërbimeve, kryesisht ato që lidhen me turizmin, dhe sektori i ndërtimit pritet të jenë kontribuesit kryesorë sektorialë në rritjen ekonomike”-nënvzion banka botërore, e cila i mbetet besnike projeksionit për nj recession të ekonomisë sonë në masën -8.4% këtë vit.

Institucioni flet edhe për rreziqet që i kanosen ekonomisë shqiptare, sidomos në aspektin fiskal. “Pozita fiskale e Shqipërisë për vitin 2020 pritet të përkeqësohet me rritjen e parashikuar të deficitit në 8.5 përqind të PBB-së. Rënia e aktivitetit ekonomik pritet të ulë raportin e të ardhurave tatimore ndaj PBB-së nga 25.7 përqind e PBB-së në 2019 në 24.1 përqind. Të dy këta faktorë së bashku, të ardhurat e ulëta dhe deficiti i lartë fiskal, pritet ta rrisin borxhin publik të Shqipërisë në 81.4 përqind të PBB-së”-nënvizon banka. Në raportin e kaluar, institucioni fliste për një normë të borxhit public në raport me PBB-në këtë vit, në 81.3%. Qeveria shqiptare ndërkohë parashikon që kjo normë të jetë në 80.9%.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.