BB: Shqipëria në recesion 5% – “Në rast se ekonomia nuk do të rihapet në verë, tkurrja në 6.9%”
Brenda muajit, Banka Botërore ka rishikuar projeksionin makroekonomik të Shqipërisë, dhe tashmë i bashkohet Fondit Monetar Ndërkombëtar, pasi flet për një rënie të ekonomisë sonë këtë vit me një normë prej 5% të Prodhimit të Brendshëm Bruto. Në raportin për Europën dhe Azinë qendrore që mban datën 9 prill të këtij viti, banka fliste për një rënie të ekonomisë shqiptare prej 1.4%. Tashmë rënia projektohet bindshëm më e mprehtë, në 5% në rastin më normal, dhe deri në 6.9% në rast se gjërat do të komplikohen edhe më shumë.
“Nese shumica e aktiviteteve ekonomike mund të rinisin në fillim të verës, rritja vjetore e PBB-së pritet të tkurret me 5 përqind për vitin 2020”-thotë Banka Botërore. “Recesioni do të jetë veçanërisht i rëndë në Malin e Zi, Shqipëri dhe Kosovë për shkak të varësisë së tyre nga turizmi”-thuhet më tej në raport. Për Kosovën ndërkohë, skenari më negativ flet për një rënie të ekonomisë në masën 11.3% këtë vit. Sa i përket konsumit, në skenarin bazë, në vendin tonë pritet të tkurret me 1.6%, dhe me 2.2% në rastin më të keq. Eksportet do të pësojnë goditjen më të madhe, me një rënie në masën 25%, në skenarin bazë, thotë Banka Botërore.
Raporti i borxhit ndaj ndaj PBB-së ndërkohë parashikohet të rritet në 75.8 përqind. “Për të përshpejtuar rimëkëmbjen ekonomike dhe për të ruajtur ritme më të shpejta të rritjes afatmesme, Shqipëria duhet të adresojë si disbalancat fiskale dhe problemin e produktivitetit. Megjithëse ekstreme, goditjet e kombinuara të epidemisë dhe tërmetit nënvizojnë rëndësinë e përmirësimit të fleksibilitetit të forcimit të ekuilibrave makroekonomikë dhe rritjes së sektorit privat. Sfidat shtesë lidhen me përdorimin e qëndrueshëm të mjedisit dhe menaxhimin e zhvendosjeve nga zonat rurale në ato urbane. Reformat strukturore për të përmirësuar mjedisin e biznesit dhe adresimin e fushave të tjera që janë pengesa për rritje të qëndrueshme dhe më të lartë ekonomike do të ndihmojnë gjithashtu në rritjen e fleksibilitetit të ekonomisë”-thotë institucioni për vendin tonë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.