“BB” vlerëson ndihmën ekonomike – “Skema e re shënjestron më saktë ata në nevojë, do të ulë varfërinë”
Banka Botërore në një studim të fundit, thotë se, qeveria shqiptare ka bërë progres të ndjeshëm në përmirësimin e transfertave direkte, që në rastin konkret i referohet skemës së re të ndihmës ekonomike.
Studimi i Bankës Botërore arrin në përfundimin se, formula e re e përfshirjes dhe targetimit të familjeve në nevojë ka rezultuar e suksesshme në tre rajonet ku është pilotuar dhe se me implementimin tashmë në rang kombëtar është përmirësuar ndjeshëm edhe saktësia e shënjestrimit që prej kohës së pilotimit.
Kjo, pasi sipas bankës, kriteret e reja të përfshirjes targetojnë më mirë ata që janë realisht në nevojë. Madje, Banka Botërore në këtë studim të posaçëm për vendin tonë, shton se, ky program pritet të përmirësohet edhe më tej, duke pasur parasysh skemën e re të përfshirjes që do të prekë edhe zona të tjera të territorit të vendit.
Për këtë arsye, shton banka, efekti që do të ketë programi i ri i ndihmës ekonomike në uljen e varfërisë do të rritet edhe më shumë në vijim, duke zhbërë kështu efektin që sistemi i taksimit ka në Shqipëri.
Nga ana tjetër shton banka, një projekt i ngjashëm me atë të ndihmës ekonomike po pilotohet për përfitimet e paaftësisë, duke përmirësuar kriteret e përfshirjes, me qëllimin për të targetuar realisht ata në nevojë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.