BE, agjenci kundër pastrimit të parasë / Do të mbikëqyrë në nivel evropian dhe koordinojë agjencitë kombëtare

Bashkimi Europian ka propozuar krijimin e një agjencie që do gjurmojë pastrimin e parasë, si dhe rregulla të reja të transparencës për trasnfertat e kriptovalutave, ndërkohë që blloku reagon ndaj thirrjeve për luftimin e parave të pista. Europa ka qenë nën presion për të përforcuar rregullat e parandalimit të pastrimit të parave, pasi shumë vende nisën të hetojnë Danske Bank për  200 miliardë euro transaksione të dyshimta që kanë kaluar përmes njësisë së vogël në Estoni nga 2007- 2015-n.  Në mungesë të një autoriteti Europian për të ndaluar paratë e pista, Brukseli i ka besuar përforcimin e rregullave rregullatorëve kombëtarë, pavarësisht se disa nuk bashkëpunojnë plotësisht.  “Pastrimi i parasë, financimi i terrorizmit dhe krimit të organizuar, qëndrojnë probleme të dukshme që duhet të trajtohen në nivel Europian”- bën të ditur dokumenti i publikuar nga Reuters.

Komisioni Europian po propozon një Autoritet të Parandalimit të Pastrimit të Parasë (AMLA) që do bëhet qendra e një sistemi të integruar mbikëqyrjeje, ku do përfshihen edhe autoritetet kombëtare.  “Duke mbikëqyrur në mënyrë direkte dhe marrë vendime mbi disa nga entet financiare më të rrezikshme përtej kufijëve, Autoriteti do të kontribuojë në parandalimin e pastrimit të parasë. Në të njëjtën kohë do koordinojë rregullatorët kombëtar”- bën të ditur dokumenti.   Një tjetër propozim do të prezantojë kërkesa të reja në BE për ofruesit e shërbimeve në kripto-aktive, për të mbledhur dhe aksesuar të dhëna në lidhje me origjinën dhe përfituesin e trasnfertave në kriptovaluta.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.