BE akordon 10 milionë euro grante për integrimin e mëtejshëm ekonomik të Ballkanit Perëndimor

Bashkimi Europian ka akorduar 10 milionë euro grante për nxitjen e mëtejshme të integrimit ekonomik për lëvizjen e lirë të mallrave, shërbimeve dhe investimeve ndërmjet vendeve të Ballkanit Perëndimor. Sipas BE-së kjo është thelbësore për integrimin e këtyre vendeve në Union:

“Komisioni Evropian e sheh bashkëpunimin rajonal si një element vendimtar për prosperitet për Ballkanin Perëndimor dhe një pjesë thelbësore të udhës së anëtarësimit të tij në BE. Një rajon që praktikon një fluks të lirë mallrash, shërbimesh, njerëzish dhe kapitali është një rajon që demonstron përparim drejt BE-së.” – shkruhej në deklaratën zyrtare nga Delegacioni i Bashkimit Evropian ne Shqiperi.

Në total janë nënshkruar tre marrëveshje të reja financuese, me Sekretariatin e Marrëveshjes së Tregtisë së Lirë të Evropës Qendrore (CEFTA), Forumin e Investimeve të 6 Dhomave të Ballkanit Perëndimor (WB6 CIF) dhe Agjencinë Gjermane për Bashkëpunim Ndërkombëtar, (GIZ) GmbH.

Grantet e reja janë një shenjë e prekshme e angazhimit afatgjatë të BE-së për ta ndihmuar Ballkanin Perëndimor për të krijuar një zonë rajonale ekonomike.

Objektivat kryesore të granteve do të jenë:

• Mbështetje për agjendën e CEFTA-s, veçanërisht në tregtinë e mallrave dhe shërbimeve, duke ndihmuar për forcimin e integrimit ekonomik rajonal (2.8 milion Euro kontribut i BE-së).
• Ndihmë administratave për të zbatuar marrëveshjet CEFTA për lehtësimin e tregtisë dhe tregtinë në shërbime, në mënyrë që të bëhen operative për kompanitë nga rajoni (4.4 milion Euro kontribut i BE-së).
• Garantimi që zëri i biznesit të dëgjohet dhe që kompanitë – veçanërisht ato të voglat dhe të mesmet – ta dinë se çfarë mundësish të reja u ofron atyre zona ekonomike rajonale (2.5 milion Euro kontribut i BE-së).

Kontrata për financimin e granteve u nënshkrua gjatë Javës vjetore të CEFTA-s, e cila kryesohej nga Shqipëria.

Drejtoresha për Ballkanin Perëndimor në Komisionin Evropian, Genoveva Ruiz Calavera, e ka cilësuar këtë mbështetje si “një moment i rëndësishëm për të vlerësuar përparimin e bërë për rritjen e tregtisë së rajonit.”

Më tej ajo shprehet:

“Kjo javë e CEFTA-s, nën kryesinë e Shqipërisë, ka qenë shumë e suksesshme me miratimin e angazhimeve të rëndësishme për të liberalizuar tregtinë në shërbime. Kontratat që nënshkruam sot do të kontribuojnë shumë për t’i kthyer këto marrëveshje në rezultate të prekshme në dobi të biznesit dhe operatorëve ekonomikë të rajonit”.

Geri Kolgega / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.